Расеі давядзецца адкласьці пастаўку шматфункцыянальных зьнішчальнікаў Су-35 у Інданэзію праз ускладненьні, зьвязаныя з амэрыканскімі санкцыямі, паведаміла расейская газэта «Коммерсант» са спасылкай на двух топ-мэнэджэраў расейскіх абаронных прадпрыемстваў і крыніцу, блізкую да ўраду.
Як паведамляецца, дамова паміж Расеяй і Інданэзіяй на пастаўку 11 зьнішчальнікаў захавала юрыдычную сілу, аднак яе рэалізацыя будзе адтэрмінаваная. Адна з крыніц газэты назвала сытуацыю «прыкрай», але «не крытычнай».
Перамовы аб пастаўцы пачаліся ў лістападзе 2015 году, але зацягнуліся з прычыны кампэнсацыйных пагадненьняў і афсэтных абавязаньняў. Кантракт на суму 1,1 мільярда даляраў быў падпісаны ў лютым, і Інданэзія разьлічвала атрымаць першыя два зьнішчальнікі да кастрычніка.
Паводле зьвестак «Коммерсанта», Расея асьцерагаецца ўвядзеньня санкцыяў супраць камэрцыйнага банку, які павінен быў удзельнічаць у рэалізацыі кантракту. У той жа час улады ЗША не далі Інданэзіі гарантыяў, што не ўвядуць санкцый ў дачыненьні да яе за супрацоўніцтва з расейскім абаронным сэктарам.
Су-35 — шматфункцыянальны супэрманэўраны зьнішчальнік 4-га пакаленьня. Хуткасьць зьнішчальніка дасягае 2500 км / г, а радыюс баявога прымяненьня — каля 1 600 км. Самалёт таксама абсталяваны гарматай калібру 33 мм і 12 вонкавымі вузламі падвескі ўзбраеньня.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў