Польскія мытнікі прадухілі кантрабанду 52 тысяч пачак цыгарэтаў на пераходзе Кузьніца-Брузгі. Як гаворыцца на сайце Мытнай службы, схованка тавару прывяла да таго, што вагон давялося цалкам адчапляць ад цягніка.
Падчас агляду аднаго з вагонаў цягніка, які ехаў у Польшчу зь Беларусі, была выяўленая схованка — пад стольлю, у спэцыяльных скрынях. Незвычайная страхоўка столі ў выглядзе цьвікоў і шрубаў з адрэзанымі галоўкамі значна ўскладніла мытнікам дэмантаж скрыні. У выніку вагон ад цягніка адчапілі цалкам. Ён знаходзіўся на чыгуначнай станцыі ў Кузьніцы да таго моманту, пакуль мытнікі не дасталі ўсю кантрабанду — 52 200 пачак цыгарэтаў бяз польскіх акцызных знакаў.
Як паведаміла Свабодзе Польская мытная служба, гэта быў цягнік Горадня — Кракаў.
Паводле ацэнак польскіх мытнікаў, калі б тавар трапіў у продаж, дзяржаўная казна страціла б каля 20 тысяч даляраў.
