Лінкі ўнівэрсальнага доступу

Чаму пустуе менская кватэра Юрыя Захаранкі? ФАТАФАКТ


Вокны кватэры зьніклага апанэнта беларускіх уладаў Юрыя Захаранкі (справа на трэцім паверсе)

На фатаздымку 2018 году відаць, як адрозьніваецца недагледжанасьцю ад суседніх кватэра зьніклага апанэнта беларускіх уладаў Юрыя Захаранкі.

Зь менскай кватэры на вуліцы Жукоўскага 9/1 7 траўня 1999 году выйшаў апошні раз з дому лідэр апазыцыі, экс-міністар унутраных спраў Юры Захаранка, лёс якога да гэтай пары невядомы.

Дагэтуль кватэра на Жукоўскага застаецца ва ўласнасьці Юрыя Захаранкі, цяпер ёю не карыстаюцца ягоныя сваякі, яе не прадалі і не здалі ў арэнду.

Па старых вокнах відаць, што кватэра недагледжаная.

Архіўнае фота. Вечарына памяці Юрыя Захаранкі. 16 красавіка 2013 году
Архіўнае фота. Вечарына памяці Юрыя Захаранкі. 16 красавіка 2013 году

Як расказала Свабодзе праваабаронца Раіса Міхайлоўская, якая шмат гадоў апякуецца справамі сям’і Захаранак, кватэра Юрыя Захаранкі стаіць замкнёная з траўня 2000 году, пасьля таго як у Нямеччыну зьехалі жонка экс-міністра Вольга з дочкамі Аленай і Юляй ды ўнукам Кірылам.

З таго часу да сваёй сьмерці ўлетку 2018 году выдаткі на ўтрыманьне кватэры аплочвала са сваёй пэнсіі маці Юрыя Захаранкі Ўльляна Рыгораўна, якая была ў ёй прапісаная, а жыла ў пасёлку Васілевічы ў Гомельскай вобласьці ў сваім доме.

Ульляна Захаранка, архіўнае фота 2016 году
Ульляна Захаранка, архіўнае фота 2016 году

«Ульляна Рыгораўна не магла ані прадаць кватэру, ані здаць яе ў арэнду, бо так і не ўступіла ў правы ўласьніцы кватэры. Гэтаму перашкаджала тое, што беларускія суды з 2003 году адмаўляліся прызнаць Юрыя Захаранку памерлым», — паведаміла Раіса Міхайлоўская.

Паводле яе зьвестак, апошнім разам, у 2016 годзе, суд адмовіў у прызнаньні Юрыя Захаранкі памерлым на той падставе, што яшчэ не завершаная крымінальная справа аб ягоным зьнікненьні. Усе спробы Ўльляны Захаранкі абскардзіць гэтае рашэньне аказаліся марнымі. У 2018 годзе Камітэт правоў чалавека ААН прыняў да разгляду скаргу Ульляны Захаранкі на беларускую дзяржаву за тое, што тая парушае яе правы на абарону ў судзе.

Раіса Міхайлоўская
Раіса Міхайлоўская

«Не прызнаюць памерлым, бо не завяршылі расьсьледаваньне, а расьсьледаваньне не завяршылі, бо нічога не расьсьледуюць. Вось такое замкнутае кола. І тое, што ўжо 18 гадоў адбываецца з кватэрай Юрыя Захаранкі — абсурд і ганьба, якія яшчэ раз дэманструюць прававое бязьмежжа ў Беларусі», — мяркуе праваабаронца Раіса Міхайлоўская.

Былы міністар першага ўраду часоў Лукашэнкі апазыцыянэр Юры Захаранка раптоўна зьнік у траўні 1999 году, і з таго часу пра ягоны лёс нічога невядома.

Сьледзтва ў справе аб зьнікненьні Юрыя Захаранкі рэгулярна падаўжаюць, але, як мяркуюць праваабаронцы Алег Воўчак і Раіса Міхайлоўская, улады толькі імітуюць пошукі Юрыя Захаранкі. У апазыцыі лічаць, што ягонае зьнікненьне — справа рук беларускіх «эскадронаў сьмерці», адмысловых групаў спэцвойскаў, якія ў канцы 1990-х гадоў выконвалі загады на фізычнае зьнішчэньне найбольш уплывовых лідэраў апазыцыі.

Сям’я Юрыя Захаранкі на пачатку 2000-х гадоў зьехала ў Нямеччыну. У жніўні 2018 году ў пасёлку Васілевічы Гомельскай вобласьці памерла ягоная маці Ўльляна Рыгораўна Захаранка, якой было 94 гады.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG