Засьцярогі з нагоды іголак, схаваных у клубніцах, распаўсюдзіліся з Аўстраліі на Новую Зэляндыю. Іголкі зьявіліся ў ягадах, якія прадаваліся ў краме ў новазэляндзкім Оклэндзе. Сетка супэрмаркэтаў Countdown зьняла з продажу ўсе аўстралійскія ягады і абвясьціла, што верне пакупнікам грошы. Пакупнікоў папярэджваюць, каб усе ягады папярэдне разразалі.
У сувязі з іголкамі ў трускалках, у сацыяльных сетках зьявіўся хэштэг #StrawberrySabotage, якім карыстальнікі папярэджваюць адзін аднаго, каб пакуль клубніцы ўвогуле не куплялі.
Іголкі ў клубніцах на мінулым тыдні зьявіліся ў крамах шасьці аўстралійскіх штатаў і тэрыторыяў. Пасьля ўжываньня трускалкі з іголкай адзін чалавек апынуўся ў шпіталі. У Новай Зэляндыі пацярпелых пакуль няма.
Аўстралійская паліцыя ў сувязі са справай дапытала, як найменш двух падлеткаў, але вінаватых дагэтуль шукаюць. Аўстралійскі ўрад некалькі дзён таму вырашыў павялічыць пакараньне за псаваньне харчоў ад 10 да 15 гадоў пазбаўленьня волі.
