16 верасьня пасажыраў цягніка «Менск — Вільня», які адправіўся зь Менску а 7:25, высадзілі на станцыі Гудагай. Пазьней сярод пасажыраў распаўсюдзілася інфармацыя, што ў цягніку знайшлі скрыню з выбухоўкай.
Пра гэта расказала відавочца падзей — журналістка тэлеканалу «Белсат» Вольга Чайчыц, якая ехала ў цягніку.
У Менску ні даведачная служба, ні дзяжурны па вакзале ня мелі ніякай інфармацыі. Свабодзе толькі паведамілі, што зь Менску цягнік выйшаў паводле раскладу — а 7:35.
А 12:30 дзяжурная па чыгуначнай станцыі Гудагай паведаміла Свабодзе, што сапраўды ў 9:32 зь цягніку Менск — Вільня з-за падазронай скрынкі былі высаджаныя ўсе пасажыры. Прыбыла адмысловая група, скрынку вывезьлі.
На аўтобусе памежнай службы тых, хто сьпяшаўся, адвезьлі на аўтамабільны памежны пераход.
Паводле дзяжурнай, праз 2 гадзіны 32 хвіліны тыя, хто ня зьехаў раней, селі ў той жа цягнік. Састаў ужо прыбыў у Вільню.
Як а 12:45 паведаміў Свабодзе апэратыўны дзяжурны Міністэрства надзвычайных сытуацый, выбухоўкі ў скрынцы ня знойдзена.
У ёй былі кантрабандныя цыгарэты.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў