Толькі 14% сталічных школьнікаў маюць першую групу здароўя — гэта значыць, што яны абсалютна здаровыя, паведаміла агенцтву «Минск-Новости» галоўны пазаштатны спэцыяліст у мэдыцынскім забесьпячэньні дзяцей у арганізаваных калектывах камітэту аховы здароўя Менгарвыканкаму Аксана Піцэвіч.
Паводле спэцыяліста, усяго сярод менскіх школьнікаў:
- 14 % маюць І групу здароўя (зусім здаровыя);
- 64% маюць ІІ групу здароўя (дзеці, у якіх няма хранічных хваробаў, але ёсьць функцыянальныя парушэньні, напрыклад лішняя вага, аслаблены зрок, а таксама дзеці, якія часта хварэюць на вострыя рэсьпіраторныя інфэкцыі);
- 20% маюць ІІІ групу здароўя (дзеці з хранічным захворваньнямі);
- 2% маюць IV групу здароўя (дзеці-інваліды).
Калі ў пачатковай школе з другой групай здароўя 66% навучэнцаў, дык ва ўзросьце 14-18 гадоў — ужо 61%, паведаміла спэцыяліст.
«Сярод захворваньняў сталічных школьнікаў наперадзе хваробы органаў дыханьня, на другім месцы — хваробы органаў зроку, на трэцім — траўмы, атручэньні, на чацьвёртым — хваробы цяглічна-касьцявой сыстэмы. Пяты радок займаюць хваробы скуры і падскурнай клятчаткі (экзэма, псарыяз)», — патлумачыла Аксана Піцэвіч.
