Кіраўнік найбуйнейшай фракцыі Эўрапарлямэнту — Эўрапейская народная партыя — нямецкі палітык Манфрэд Вэбэр пацьвердзіў, што будзе балятавацца ў 2019 годзе на пасаду кіраўніка Эўрапейскай камісіі — галоўнага органу выканаўчай улады ў Эўразьвязе.
Абвяшчаючы сваю кандыдатуру, Вэбэр напісаў у Твітэры, што ЭЗ «ня можа весьці справы так, як цяпер», і што ён мае намер «вярнуць Эўропу яе грамадзянам».
Вэбэр — прадстаўнік баварскага Хрысьціянска-сацыяльнага саюзу, які зьяўляецца палітычным саюзьнікам хрысьціянскіх дэмакратаў канцлера Ангелы Мэркель. Раней паведамлялася, што Мэркель падтрымлівае яго кандыдатуру.
На выбарах у Эўрапарлямэнт партыі прапануюць сваіх кандыдатаў на пасаду кіраўніка Эўракамісіі. Як правіла, пры зацьвярджэньні кіраўніка Эўракамісіі Эўрапарлямэнт прыслухоўваецца да меркаваньня выбаршчыкаў і абірае кандыдата з найбуйнейшай фракцыі.
Цяпер кіраўніком Эўракамісіі зьяўляецца люксэмбурскі палітык Жан-Клёд Юнкер.
Манфрэд Вэбэр вядомы як даволі пасьлядоўны крытык палітыкі Крамля. Ён неаднаразова абвінавачваў Расею ў агрэсіі супраць Украіны, а таксама ў імкненьні аслабіць Эўразьвяз.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў