Паліцыя Эгіпту ў аўторак арыштавала мужчыну з самаробным выбуховым прыстасаваньнем каля будынку пасольства ЗША ў Каіры, якое моцна ахоўваецца.
Па словах крыніцаў у эгіпэцкіх правахоўных органах, мужчына, імя якога не называецца, быў затрыманы каля бэтоннай агароджы вакол амэрыканскага і брытанскага пасольстваў у раёне Гардэн-Сіці.
Пасольства ЗША паведаміла ў Твітэры, што атрымала паведамленьні аб інцыдэнце і параіла амэрыканскім грамадзянам устрымацца ад наведваньня гэтага раёну.
Раён вакол пасольства дзясяткі гадоў узмоцнена ахоўваецца паліцыяй, а вакол устаноўленыя бэтонная загарода, якая блякуе рух аўтамабіляў у непасрэднай блізкасьці ад будынку. Пасольства Вялікабрытаніі разьмешчанае праз дарогу ад амэрыканскага.