27 жніўня Пячэрскі раённы суд Кіева па патрабаваньні Генэральнай пракуратуры даў ёй дазвол атрымаць ад правайдэра інфармацыю па тэлефоне кіраўніцы праграмы журналісцкіх расьсьледаваньняў «Схемы» Радыё Свабода Натальлі Сядлецкай.
У пастанове гаворыцца аб прадстаўленьні доступу сьледзтва да званкоў і смс-паведамленьняў журналісткі зь ліпеня 2016-га па лістапад 2017-га году і да дадзеных аб месцазнаходжаньні яе тэлефона на працягу гэтых 17 месяцаў.
Як адзначае Радыё Свабода, за гэты час рэдакцыя «Схем» ажыцьцявіла і апублікавала шэраг расьсьледаваньняў аб украінскіх чыноўніках, уключаючы дзейнасьць генэральнага пракурора Ўкраіны.
Сядлецкая разам з шэрагам іншых журналістаў праходзіць сьведкай па справе аб магчымым разгалошаньні дзяржаўнай таямніцы і дадзеных дасудовага расьсьледаваньня дырэктарам Нацыянальнага антыкарупцыйнага бюро (НАБУ) Арцёмам Сытнікам.
Радыё Свабодная Эўропа/Радыё Свабода абуранае рашэньнем украінскага суду, які даў Генэральнай пракуратуры Ўкраіны доступ да інфармацыі па тэлефоне Сядлецкай.
Гэта рашэньне зьяўляецца празьмерным, яно груба парушае міжнародныя стандарты і не адпавядае абавязацельствам Украіны па абароне свабоды друку, адзначыла прэсавая сакратарка Радыё Свабодная Эўропа/Радыё Свабода Джаана Левісан.
Адвакаты радыё рыхтуюць скаргу кіраўніцтву пракуратуры аб «перавышэньні сьледчым межаў дапушчальнага ўмяшальніцтва ў правы асобы на прыватнае жыцьцё і абарону крыніц інфармацыі журналіста, а таксама будуць скардзіцца ў Вышэйшую раду правасудзьдзя на судзьдзю Пячэрскага суду Кіева Вячаслава Підпалага за дапушчаныя парушэньні пры разглядзе справы і вынясеньні неабгрунтаванага рашэньня.
У сьнежні 2017 года Натальлю Сядлецкую выклікалі на шматгадзінны допыт у Генэральную пракуратуру па справе супраць кіраўніка НАБУ. На допыце журналістка спаслалася на прамую норму Крымінальна-працэсуальнага кодэксу, згодна зь якой журналістаў не могуць дапытваць як сьведкаў аб зьвестках, якія ўтрымліваюць канфідэнцыйную інфармацыю прафэсійнага характару, прадстаўленую пры ўмове невыдаваньня аўтарства або крыніцы інфармацыі.
Натальля Сядлецкая — ляўрэатка шматлікіх журналісцкіх узнагародаў як украінскіх, так і міжнародных. Стыпэндыят прэміі імя Вацлава Гаўла за 2013-2014 акадэмічны год (сумесная праграма Радыё Свабода і МЗС Чэхіі). Пераможца шэрагу конкурсаў журналісцкіх расьсьледаваньняў. Чалец міжнароднай сеткі журналістаў-расьсьледавацеляў Orginized Crime and Corruption Reporting project (OCCRP).
«Схемы: карупцыя ў дэталях» — украінская штотыднёвая тэлевізійная праграма журналісцкіх расьсьледаваньняў і аналітыкі аб карупцыі ў вышэйшых эшалёнах улады, якая выходзіць у эфір з ліпеня 2014 году. Сумесны праект Радыё Свабода і тэлеканала «UA: Першы».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў