Дэпутатка Палаты прадстаўнікоў Ганна Канапацкая накіравала запыт міністру антыманапольнага рэгуляваньня і гандлю Ўладзімеру Калтовічу з просьбай праверыць дзейнасьць дзяржаўных СМІ на прадмет парушэньня імі антыманапольнага заканадаўства, паведамляе БелаПАН.
У запыце дэпутатка адзначае, што ў Беларусі рынак інфармацыі (кантэнту) і аналітыкі характарызуецца «небясьпечнымі праявамі дыскрымінацыйных, манапалістычных практык» з боку дзяржаўных вытворцаў, якія па факце працуюць у рамках адзінага дзяржаўнага холдынгу пад кіраўніцтвам Міністэрства інфармацыі.
«Мае месца грубы канфлікт інтарэсаў, калі ў адным органе дзяржаўнага кіраваньня канцэнтруюцца функцыі заканадаўцы, рэгулятара, ліцэнзіяра, камэрсанта, фінансіста і кантралёра, — гаворыцца ў звароце. — Кіруючая кампанія холдынгу „Дзяржаўныя СМІ“, яе ключавыя вытворцы (БелТА, БТ, АНТ, СТВ, „СБ. Беларусь сегодня“ і іншыя) актыўна выкарыстоўвае фінансавыя, адміністрацыйныя, рэгулятарныя і бюракратычныя інструмэнты для раскрыцьця сваёй манапалістычнай улады, што вядзе да дыскрымінацыі прыватных вытворцаў інфармацыі і аналітыкі.
У выніку дзяржаўныя вытворцы маюць нярынкавыя перавагі на рынку рэклямы. З дапамогай такіх інструмэнтаў, як акрэдытацыя на мерапрыемствы, што праводзяцца рознымі органамі дзяржкіраваньня, доступ да стэнаграмы паседжаньняў дзяржаўных органаў, да друкарняў, тэлебачаньня і радыё, адбываецца дыскрымінацыя прыватных суб’ектаў камэрцыйнай дзейнасьці».
На думку Канапацкай, сытуацыю пагаршае выбарчае бюджэтнае датаваньне дзяржаўных вытворцаў на рынку інфармацыі і аналітыкі, калі грошы падаткаплатнікаў павінны ісьці «на вытворчасць інфармацыі і аналітыкі для ўсіх грамадзян і субʼектаў гаспадараньня, а асобныя дзяржаўныя вытворцы інфармацыі прысвойваюць іх сабе з мэтай перапродажу сваім прыватным канкурэнтам і манэтызацыі сваіх нярынкавых пераваг на рынку».
«Да таго ж, прыватныя камэрцыйныя арганізацыі ня могуць прэтэндаваць на бюджэтныя датацыі, ільготныя стаўкі па арэндзе памяшканьняў, а таксама на гарантаванае атрыманьне рэклямных кантрактаў з дзяржаўнымі субʼектамі гаспадараньня», — адзначаецца ў запыце.
Ганна Канапацкая падкрэсьлівае, што на рынку інфармацыі і аналітыкі «маюць месца сыстэмныя грубыя парушэньні» закону «Аб процідзеяньні манапалістычнай дзейнасьці і разьвіцьці канкурэнцыі», а ў краіне ў гэтым сэгмэнце эканомікі створаны «адміністрацыйна-прававыя ўмовы, якія блякуюць грамадзянам Рэспублікі Беларусь рэалізацыю іх канстытуцыйных правоў».
Канапацкая просіць Міністэрства антыманапольнага рэгуляваньня і гандлю правесьці ацэнку стану канкурэнтнага поля на рынку інфармацыі і аналітыкі на прадмет выкананьня закона «Аб процідзеяньні манапалістычнай дзейнасьці і разьвіцьці канкурэнцыі», а таксама зрабіць неабходныя захады для ліквідацыі парушэньняў законнасьці.
