Лінкі ўнівэрсальнага доступу

Амбасадар Казахстану: «Мы гатовыя пастаўляць нафту ў Беларусь хоць заўтра»


Астана. Від зь вежы «Байтэрэк»

Новы амбасадар Казахстану ў Беларусі Ермухамэт Эртысбаеў заявіў, што ягоная краіна гатовая пастаўляць у Беларусь столькі нафты, колькі патрэбна беларусам.

Расейская транзытная прастора як перашкода

Адказваючы на пытаньне Радыё Свабода пра магчымасьць нафтавых паставак, дыплямат заявіў наступнае.

«У нас нафты хапае. І мы гатовыя пастаўляць яе ў Беларусь хоць заўтра. Адзіная перашкода — паміж нашымі краінамі велізарная расейская транзытная прастора», — сказаў Ермухамэт Эртысбаеў.

Амбасадар удакладніў, што Казахстан з дапамогай Злучаных Штатаў мадэрнізаваў сваю нафтавую галіну, за кошт гэтага краіна мае прыкладна 70-80 мільярдаў даляраў нафтавых грошай, якія знаходзяцца ў дзяржаўным рэзэрве.

Выказваньні прэзыдэнта Нурсултана Назарбаева на плякатах
Выказваньні прэзыдэнта Нурсултана Назарбаева на плякатах

Што да беларуска-казахстанскага таваразвароту, то, як адзначыў дыплямат, ён на карысьць Менска. Казахстан прадае Беларусі тавараў прыкладна на 100 мільёнаў даляраў, а купляе тут на 600 мільёнаў. Плюс рэалізуе сыравіну, а набывае гатовыя тавары.

Казахстан як краіна высокаадукаваных людзей

Паводле амбасадара, у сярэдзіне 1990-х даход на душу насельніцтва ў Казахстане складаў 600 даляраў, а ў апошнія гады — ужо 12-14 тысяч даляраў. Гэта адбылося за кошт таго, што ад самага пачатку кіраўніцтва дзяржавы ўзяло курс на научаньне маладых кадраў.

Па словах Ермухамэта Эртысбаева, яшчэ ў 1994 годзе ў Казахстане была прынятая праграма „Будучыня“, якая эфэктыўна працуе вось ужо амаль чвэрць стагодзьдзя.

«Лепшыя выпускнікі школаў накіроўваюцца за дзяржаўны кошт у ЗША, Заходнюю Эўропу, Азію, у самыя топавыя ўнівэрсытэты. Яны вучацца сучасным мэтадам кіраваньня, пасьля чаго вяртаюцца на радзіму і праводзяць палітыку мадэрнізацыі. Да таго ж, у нас працуе свая ўстанова — „Назарбаеў-унівэрсытэт“, у яго ўкладзена каля 1 мільярду даляраў. Навучаньне ў ім праходзіць на ангельскай мове, маецца моцны штат выкладчыкаў, туды прыяжджаюць зь лекцыямі вядомыя навукоўцы з усяго сьвету», — адзначыў Ермухамэт Эртысбаеў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG