Сэпаратысты ў Данецку выбіваюць паказаньні з затрыманых пасьля гібелі лідэра так званай «ДНР» Аляксандра Захарчанкі. Гэта са спасылкай на свае крыніцы сьцьвярджае Павел Лісянскі — прадстаўнік амбудсмэна Ўкраіны ў Данецкай і Луганскай абласьцях.
Па словах Лісянскага, пасьля выбуху ў Данецку, у выніку якога 31 жніўня загінуў Захарчанка, сэпаратысты затрымалі 14 чалавек. Чацьвёра зь іх, як сьцьвярджаецца, прызналіся ў супрацоўніцтве з украінскімі спэцслужбамі. «Але гэта фэйк, паказаньні выбівалі», — перакананы Лісянскі.
Кіраўнік Службы бясьпекі Ўкраіны Васіль Грыцак адхіліў абвінавачваньні на адрас ўкраінскіх спэцслужбаў. Паводле яго, галоўныя вэрсія забойства Захарчанкі — камэрцыйны канфлікт сярод саміх сэпаратыстаў. Грыцак сказаў, што ў Данецку няма ўкраінскай дывэрсійнай групы, паколькі СБУ нікога туды не дасылала.
У сваю чаргу МЗС Расеі фактычна абвінаваціў Кіеў у датычнасьці да забойства.
Аляксандр Захарчанка, які называў сябе «кіраўніком ДНР», загінуў у выніку выбуху ў кавярні «Сэпар», дзе былі запянаваныя памінкі па памерлым сьпеваку Ёсіфу Кабзону. Загінуў таксама ягоны ахоўнік, яшчэ 12 чалавек параненыя.
Пахаваньне лідэра прарасейскіх сэпаратыстаў адбудзецца 2 верасьня. Чакаецца, што ў Данецк прыедуць кіраўнік анэксаванага Крыму Сяргей Аксёнаў, дэпутат Дзяржаўнай думы Натальля Паклонская ды іншыя пракрамлёўскія палітыкі.