Лінкі ўнівэрсальнага доступу

Трамп заявіў пра намер дэмакратаў «гвалтоўна» перапыніць яго курс


Дональд Трамп падчас выступу ў Заходняй Вірджыніі, 21 жніўня 2018

Прэзыдэнт ЗША Дональд Трамп лічыць, што дэмакраты «гвалтоўна» перапыняць яго палітычны курс, калі перамогуць на прамежкавых выбарах у лістападзе.

Пра гэта ён сказаў падчас выступу перад лідэрамі эвангелістаў.

«Дэмакраты скасуюць усё, што мы зрабілі, і зробяць гэта хутка і гвалтоўна. Яны скончаць з усім неадкладна», — заявіў Трамп.

На яго думку, ад «левага» флянгу, да якога кіраўнік дзяржавы аднёс і антыфашыстаў, зыходзіць пагроза «гвалту». Ён назваў гэтыя выбары «рэфэрэндумам» у пытаньнях свабоды слова і рэлігіі.

Прэзыдэнт ЗША сказаў, што хрысьціянскія групы павінны галасаваць за рэспубліканцаў, каб ня «страціць усё». Амэрыканскі лідэр заклікаў эвангелістаў выкарыстоўваць сваю «велічэзную сілу» для ўплыву на сотні мільёнаў выбаршчыкаў.

У мінулым годзе Трамп раскрытыкаваў «левыя групы» пасьля таго, як нацыяналіст забіў дэманстранта левых поглядаў падчас нацыяналістычнай маніфэстацыі ў Шарлатсвілі. Тады ён абвінаваціў абодва бакі ў гвалце.

Цяпер рэспубліканцы маюць большасьць у абедзьвюх палатах Кангрэсу. Гэтая сытуацыя можа зьмяніцца ўжо восеньню, сурʼёзна паўплываўшы на здольнасьць Трампа праводзіць ранейшы курс. Абедзьве партыі пазмагаюцца за ўсе 435 месцаў у Палаце прадстаўнікоў, а таксама за 33 месцы са 100 у Сэнаце.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG