Лінкі ўнівэрсальнага доступу

У Менску адкрыюць манумэнт касманаўтам


Плянэтарый у Менску
Плянэтарый у Менску

Падчас Міжнароднага кангрэсу Асацыяцыі ўдзельнікаў касьмічных палётаў у Менску адкрыюць алею касманаўтаў у Батанічным садзе і манумэнт касманаўтам на аднайменнай вуліцы. Форум пройдзе ў беларускай сталіцы з 9 па 15 верасьня, паведаміў намесьнік старшыні прэзыдыюму Нацыянальнай акадэміі навук Сяргей Кілін.

На кангрэс у Менск прыедуць 90 касманаўтаў з 19 краінаў, у тым ліку і тры беларусы: Пятро Клімук, Уладзімер Кавалёнак, Алег Навіцкі. Яшчэ адзін касманаўт зь беларускімі каранямі, Алег Арцем’еў, цяпер у космасе.

У Асацыяцыю ўдзельнікаў касьмічных палётаў, створаную 30 год таму, увайшлі ўсе астранаўты сьвету. Іх цяпер каля 400. Папярэдні кангрэс праходзіў у францускай Тулузе.

Галоўная мэта менскага кангрэсу, на думку Сяргея Кіліна, — прывабіць маладых людзей да космасу. Ён згадаў, што калі Юры Гагарын зрабіў першы касьмічны палёт, то ў моладзі гарэлі вочы.

«Усе хацелі быць касманаўтамі, гэтая прафэсія лічылася самай прэстыжнай. Сёньня ў моладзі іншыя прыярытэты, — сказаў намесьнік старшыні прэзыдыюму Нацыянальнай акадэміі навук. — Але было б добра, каб яна зноў вярнулася да касманаўтыкі».

Менавіта з гэтай мэтай і будуць арганізаваныя сустрэчы ўдзельнікаў кангрэсу зь беларускімі студэнтамі і школьнікамі. У Менск прыедуць лепшыя вучні з усіх абласьцей краіны.

Беларусь рыхтуе новы касьмічны апарат

«Ягоны эскізны праект будзе завершаны ўжо сёлета, — сказаў журналістам галоўны канструктар Беларускай касьмічнай сыстэмы дыстанцыйнага зандажу Зямлі Сяргей Залаты. — Дакладнай даты запуску пакуль няма, бо апарат павінен прайсьці працяглую экспэртызу».

Магчымасьці новага касьмічнага апарату дазволяць рабіць здымкі лепшай якасьці і большага маштабу.

На дадзены момант у касьмічнай прасторы лётаюць два супольныя беларускія спадарожнікі — беларуска-расейскі і беларуска-кітайскі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG