27 жніўня ў Менгарвыканкам падалі заяўку на правядзеньне 15 верасьня акцыі салідарнасьці зь незалежнымі сродкамі масавай інфармацыі і прафсаюзамі, паведамляе БелаПАН.
Заяўку падпісалі старшыні руху «За Свабоду» Юрась Губарэвіч, Аб’яднанай грамадзянскай партыі Васіль Палякоў і сустаршыня аргкамітэту па стварэньні партыі «Беларуская хрысьціянская дэмакратыя» Віталь Рымашэўскі.
Як паведаміў БелаПАН Юрась Губарэвіч, заяўнікі просяць менскія ўлады дазволіць дэманстрацыю ад кінатэатра «Кастрычнік» і мітынг каля опэрнага тэатра.
«Мэта акцыі — публічная дэманстрацыя салідарнасьці зь незалежнымі СМІ і прафсаюзамі, у абарону свабоды і законнасьці ў Беларусі», — паведаміў палітык.
24 жніўня сем апазыцыйных палітычных партый і арганізацый прынялі заяву «Аб нацыянальнай салідарнасьці ў абарону свабоды і законнасьці ў Беларусі», у якой патрабуюць ад уладаў спыніць палітыку рэпрэсіяў і ціску на СМІ і прафсаюзы, а таксама агучылі стратэгічны плян дзеяньняў у абарону свабоды і законнасьці ў Беларусі.
Заяву падпісалі кіраўнікі Аб’яднанай грамадзянскай партыі, беларускай партыі «Зялёныя», Беларускай сацыял-дэмакратычнай партыі (Грамада), па стварэньні аргкамітэту Партыі БХД, Партыі БНФ, Руху «За Свабоду» і прафсаюзу РЭП.
У дакумэнце гаворыцца, што беларускія ўлады «мэтанакіравана і няспынна зьнішчаюць палітычную апазыцыю і грамадзянскую супольнасьць».
