Партал Kyky.org выдаліў навіну аб будоўлі стадыёну ФК Смалявічы пасьля ліста Міністэрства інфармацыі. Прычынай стала цытата прэс-сакратара клюбу Аляксея Казыры, якая складалася з мацюкоў.
Пазыцыя міністэрства. Ведамства запатрабавала прывесьці публікацыю ў адпаведнасьць з патрабаваньнямі Закону аб СМІ, які забараняе лаянку. Пра выдаленьне матэрыялу не ішлося.
Пазыцыя Kyky.org. Нататка, на якую паскардзіліся ў міністэрства, сапраўды на траціну складалася з лаянкі, але яе зацэнзуравалі зорачкамі. З сайта навіну выдалілі (Google cache), у сацыяльных сетках выданьня згадку пра публікацыю пакінулі.
Паскардзіўся на публікацыю Kyky.org намесьнік галоўнага рэдактара расейскага «Радио Комсомольская правда» Канстанцін Прыдыбайла, які раней працаваў у Белтэлерадыёкампаніі.
«Можна было паправіць тэкст, але яны так захацелі. Іх рашэньне», — пракамэнтаваў выдаленьне артыкула Прыдыбайла.
Галоўны рэдактар Kyky.org Анастасія Рагатко ў камэнтары Свабодзе сказала, што навіну выдалілі, бо:
- Незразумела, што канкрэтна не задавальняе чалавека, які зьвярнуўся ў Мінінфарм.
- У 2015 годзе Мінінфарм заблякаваў Kyky.org пасьля зваротаў грамадзян.
«У нас уся нелегальная лексыка была зацэнзураваная больш чым дастаткова. Калі яе вельмі шмат — гэта пытаньне да прэс-сакратара ФК, а не да нас. Калі цалкам прыбіраць цытату з навіны, яна будзе несьці нулявы сэнс. Да таго ж навіны жывуць, пакуль іх чытаюць, а тую навіну ўжо прачыталі ўсе ахвотныя», — сказала Рагатка.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў