Лінкі ўнівэрсальнага доступу

Праграма фінансавай дапамогі Грэцыі завершылася. Кажуць, усё кепска


Ілюстрацыйнае фота

Грэцыя пасьпяхова завершыла трохгадовую праграму вонкавай макрафінансавай дапамогі эўразоны, распрацаванай дзеля ліквідацыі наступстваў пазыковага крызісу, піша BBC.

Цяпер — упершыню за восем гадоў — Грэцыя можа вольна (або амаль вольна — пад кантролем Эўракамісіі) пазычаць грошы на фінансавых рынках.

Эўрапейскі стабілізацыйны мэханізм надаў краіне амаль 62 млрд эўраў цягам апошніх трох гадоў, разам з дапамогай МВФ з 2010 году краіна атрымала звыш 260 млрд эўраў. Гэта найбольшая фінансавая дапамога адной дзяржаве ў гісторыі чалавецтва.

Умовай пазыкаў было правядзеньне шэрагу непапулярных рэформаў. Але нават з рэформамі рост эканомікі Грэцыі быў павольным, аб’ёмы эканомікі засталіся на чвэрць меншымі, чым да пачатку крызісу.

«Цяпер Грэцыя можа стаяць на сваіх нагах», — заявіла кіраўніцтва Эўрапейскага стабілізацыйнага фонду.

У СМІ па абодва бакі Атлянтычнага акіяну гучаць сумневы ў эфэктыўнасьці «ратаваньня» Грэцыі. Так, The Guardian публікуе артыкул пра дапамогу Грэцыі з фразай «гэта быў правал», The New York Times — з падзагалоўкам «Боль, далёкі ад завяршэньня».

Паводле выданьняў, краіну чакаюць доўгатэрміновыя наступствы: скарачэньне выдаткаў бюджэту і падвышэньне падаткаў прывялі да зьмяншэньня колькасьці працоўных месцаў, падзеньня падатковых прыбыткаў, падвышэньня дзяржаўнай запазычанасьці — і ў выніку яшчэ большага скарачэньня выдаткаў. Даходы грэкаў упалі на 30%, траціна 10-мільённага насельніцтва цяпер знаходзіцца ля мяжы беднасьці або за ёю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG