Нягледзячы на дадатковы набор, у двух унівэрсытэтах Беларусі засталіся вольнымі 14 бюджэтных месцаў, паведамляе Tut.by. Не далічыліся абітурыентаў у Беларуска-расейскім унівэрсытэце і ў Мазырскім пэдагагічным. Набор ужо закрыты.
У Беларуска-расейскім унівэрсытэце, што ў Магілёве, не дабралі дзесяць чалавек. Усе на спэцыяльнасьць «Пад’ёмна-транспартныя, будаўнічыя, дарожныя машыны і абсталяваньне». Плян прыёму на дзённае бюджэтнае навучаньне тут складаў 20 месцаў.
Ва ўнівэрсытэце кажуць, што ў ранейшыя гады ахвотных вучыцца на гэтай спэцыяльнасьці хапала.
Паводле адказнага сакратара прыёмнай камісіі Дзьмітрыя Сьвірэпы, прычын недабору некалькі:
- павышэньне прахадных балаў (напрыклад, мінімальны парог балаў на ЦТ па матэматыцы вырас на пяць пунктаў)
- тэхнічныя спэцыяльнасьці ў абітурыентаў менш папулярныя, чым юрыдычныя і эканамічныя.
- ахвотных здаваць на ЦТ фізыку з кожным годам усё менш.
У Мазырскім пэдагагічным унівэрсытэце на спэцыяльнасьць «Фізыка і інфарматыка» не дабрали чатырох чалавек. Усяго на дзённае аддзяленьне на бюджэт сюды набіралі 22 студэнтаў.
«Сёлета вельмі многія ВНУ мелі першапачатковы недабор. Ня толькі рэгіянальныя, але і сталічныя, — сказаў Дзьмітры Сьвірэпа. — Такога, напэўна, за ўсе гады не было, каб на бюджэт не маглі набраць».
