Прэзыдэнт Украіны Пятро Парашэнка паведамляе, што ў гэтым годзе ў Дзень незалежнасьці Ўкраіны 24 жніўня, прывітаньне «Слава Ўкраіне — Героям слава!» упершыню прагучыць як частка афіцыйнай цырымоніі параду.
«Я прыняў рашэньне, што пачынаючы з 24 жніўня гэтыя словы ўпершыню прагучаць як частка афіцыйнай цырымоніі вайсковага параду ў гонар Дня незалежнасьці Ўкраіны. І да пачатку працы новай сэсіі Вярхоўнай рады Ўкраіны, паколькі гэта зьмены ў статуты Ўзброеных сіл Украіны, гэтыя словы і гэтае прывітаньне стане афіцыйным вайсковым прывітаньнем Узброеных сіл Украіны», — сказаў Парашэнка.
7 жніўня міністар абароны Ўкраіны Сьцяпан Палтарак паведаміў, што прэзыдэнт даручыў распрацаваць законапраект, які прадугледжвае замену вайсковага прывітаньня ва Ўзброеных сілах Украіны ўзору «Добры дзень, таварышы!» і «Жадаем здароўя» на «Слава Ўкраіне!» і «Героям слава!».