Лінкі ўнівэрсальнага доступу

Reuters: Расея хоча абмежаваць пастаўкі паліва ў Беларусь і прыпыніла крэдыты


Расея прыпыніла выдачу крэдытаў Беларусі і мае намер абмежаваць Менску бяспошлінныя пастаўкі нафтапрадуктаў і звадкаванага газу з чацьвёртага кварталу 2018 году, спасылаючыся на страты свайго бюджэту, паведамляе Reuters.

Пра гэта сьведчаць пратакол зьменаў да двухбаковай міжурадавай дамовы і тлумачальная запіска Белнафтахіму, копіямі якіх валодае Reuters.

Масква мае намер адмовіць Менску ў чарговых крэдытных траншах Эўразійскага фонду, які кантралюе Расея, а таксама ня дасьць дзяржаўнага крэдыту на 2019 год.

«Расейскі бок ініцыяваў спыненьне практыкі бесьперашкоднага вывазу з Расейскай Фэдэрацыі ў Рэспубліку Беларусь нафтапрадуктаў, матывуючы гэта стратамі расейскага бюджэту ва ўмовах павелічэньня аб’ёму іх вывазу», — гаворыцца ў тлумачальнай запісцы да пратакола зьменаў міжурадавай дамовы намесьніка старшыні Белнафтахіму Андрэя Рыбакова.

Па гэтай прычыне «часова заблякаванае пералічэньне Беларусі двух траншаў крэдытнай лініі ЭФСР (Эўразійскага фонду стабілізацыі і разьвіцьця), у ліпені 2018 году прыпыненая выплата па так званым мэханізьме „ператаможкі“, а таксама прыпыненая праца па прадстаўленьні Беларусі дзяржкрэдыту да $1 мільярда у 2019 годзе».

У дакумэнце адзначаецца, што Расея чакае кампэнсацыі за пастаўленыя раней у Беларусь нафтапрадукты.

«Аднаўленьне далейшага супрацоўніцтва... расейскі бок увязвае з вырашэньнем пытаньня па ўсталяваньні забароны на вываз нафтапрадуктаў з Расеі ў Беларусь і кампэнсацыі страт расейскага бюджэту за раней вывезеныя нафтапрадукты», — адзначаецца ў запісцы Рыбакова.

Крыніца ва ўрадзе Расеі пацьвердзіла Reuters, што Масква заклапочаная ростам паставак нафтапрадуктаў у Беларусь, ад якога пакутуе расейскі бюджэт.

«Вырасьлі пастаўкі нафтапрадуктаў у Беларусь... Паколькі гэта бяспошлінныя пастаўкі — для Расеі гэта выпадаючыя прыбыткі. Цяпер ідзе дыскусія, каб унесьці нейкія абмежавальныя меры для таго, каб гэтую сытуацыю выключыць», — адзначыла крыніца.

Крыніца ў фінансавых колах, знаёмая з ходам перамоваў, сказала, што пералічэньне траншаў было прыпыненае з прычыны «новых рознагалосьсяў паміж Расеяй і Беларусьсю па нафце і газу».

Лукашэнка: «Расейцы паводзяць сябе па-барбарску ў адносінах да нас»

Аляксандар Лукашэнка падчас паездкі ў Гомель 10 жніўня 2018 году.
Аляксандар Лукашэнка падчас паездкі ў Гомель 10 жніўня 2018 году.

Кіраўнік Беларусі Аляксандар Лукашэнка папракнуў Расею ў нядобрасумленнай канкурэнцыі і невыкананьні абавязаньняў у рамках Эўразійскага эканамічнага саюзу. Пра гэта ён заявіў сёньня, наведваючы ААТ «Гомсельмаш», піша БелТА.

«Я хачу захаваць „Гомсельмаш“. У нас цяпер цяжкі пэрыяд — расейцы паводзяць сябе па-барбарску ў адносінах да нас, публічна пра гэта кажу. Яны ад нас патрабуюць чагосьці, як быццам мы васалы ў іх, а ў рамках ЭАЭС, куды яны нас запрасілі, яны выконваць свае абавязаньні не жадаюць. Вось яны і ствараюць неканкурэнтную сытуацыю», — заявіў ён.

Лукашэнка адзначыў, што ў Расеі папракаюць амэрыканцаў і Захад у стварэньні «неканкурэнтнай перавагі».

«А самі ж яны для нас такія ж неканкурэнтныя ствараюць умовы. Гэта яшчэ тэма нашай размовы з прэзыдэнтам Расеі. Але мы павінны працаваць у тых умовах, у якіх сёньня існуем», — сказаў кіраўнік дзяржавы.

***

Міністэрства фінансаў Беларусі адмовілася ад камэнтароў, Міністэрства фінансаў і энэргетыкі Расеі таксама ня сталі камэнтаваць сытуацыю.

Эўразійскі фонд ухваліў крэдыт Беларусі на $2 мільярды ў 2016 годзе. На гэты час Менск атрымаў пяць траншаў на $1,6 мільярда і разьлічваў атрымаць шосты транш на $200 мільёнаў у канцы 2017 году, і сёмы, на тую ж суму, у першым квартале 2018 году. Аднак фонд адклаў выдачу шостага траншу праз тое, што, на яго думку, Беларусь ня выканала яго ўмовы.

У 2017 годзе Расея і Беларусь дамовіліся пра пастаўкі ў адрас Белнафтахіму 24 мільёнаў тон нафты ў год у рамках індыкатыўна балянсу, зь якіх фактычна пастаўляецца 18 мільёнаў тон нафты, а за недапастаўленыя 6 мільёнаў тон Масква абавязалася кампэнсаваць Менску выпадаючыя прыбыткі ад экспартнай пошліны, згодна з разьліковым мэханізмам, які носіць назву «ператаможка». Асноўнай умовай кампэнсацыйных выплат было вяртаньне даўгоў Маскве за пастаўкі газу, якія неаднаразова затрымліваліся, кажуць крыніцы Reuters.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG