Лінкі ўнівэрсальнага доступу

Справу супраць мэра Харкава Кернэса аб выкраданьні, катаваньнях і пагрозе забойствам закрылі


Генадзь Кернэс

Кіеўскі раённы суд Палтавы 10 жніўня закрыў крымінальную справу супраць мэра Харкава Генадзя Кернэса і двух яго ахоўнікаў. Генэральная пракуратура Ўкраіны вінаваціла іх у выкраданьні чалавека, катаваньнях і пагрозе забойствам двум жыхарам Харкава, актывістам Эўрамайдану.

«Справа супраць Генадзя Кернэса і двух яго ахоўнікаў закрытая», — абвясьціў у пятніцу рашэньне суду судзьдзя Андрэй Антонаў. Судзьдзя патлумачыў, што рашэньне прынятае ў сувязі з адкліканьнем Генэральнай пракуратурай абвінаваўчага заключэньня.

Кернэс пасьля абвяшчэньня рашэньня сказаў журналістам, што справа «рассыпалася» і пракуратура не змагла даказаць яго віны. «Доказаў у суду не былі», — заявіў ён.

Судебный процесс над мэром Харькова
пачакайце

No media source currently available

0:00 0:02:30 0:00
Наўпроставы лінк

У 2014 годзе ў Харкаве праходзілі масавыя пратэстныя акцыі. Актывісты Эўрамайдану патрабавалі адстаўкі Кернэса. 25 студзеня 2014 году невядомыя напалі на ўдзельнікаў шэсьця Эўрамайдану ў Харкаве. У той жа дзень тагачасны дэпутат Харкаўскага абласнога савету Іван Варчанка заявіў пра выкраданьне двух актывістаў. Паводле адной з вэрсій, яны здымалі на відэа нумары машын сяброў Кернэса каля гатэлю «Нацыянальны», дзе жыў мэр.

«Аўтамабілі былі без нумароў або былі з расейскімі нумарамі, у нас узьнікла здагадка, што там абмяркоўваюць, як спыняць Эўрамайдан. Мы спрабавалі зьняць гэта на відэа, за намі пачалася пагоня. Мяне ў выніку пагоні злавілі. Яны мяне зацягнулі ў машыну, адвезьлі на задні двор гатэлю і там пачалі дапытваць. Пастаянна рэгулярна білі, то па твары, то па тулаве», — распавядаў пра здарэньне актывіст Эўрамайдану Аляксандр Куцянін.

Паводле словаў Аляксандра, крыху пазьней ахова Кернэса злавіла і другога актывіста, і яго таксама пачалі катаваць. Прычым, як запэўніваюць эўрамайданаўцы, Кернэс прымаў у гэтым працэсе непасрэдны ўдзел.

«У выніку атрымаў пералом носа і пагрозу, што мяне вынесуць нагамі наперад, калі хаця б кропля крыві ўпадзе на дыван», — успамінаў актывіст Эўрамайдану Сяргей Рапалаў.

2 сакавіка 2015 году Кернэсу і двум яго ахоўнікам былі выстаўленыя абвінавачаньні ў незаконным пазбаўленьні волі або выкраданьні чалавека, катаваньнях і пагрозе забойствам. Сам Кернэс і яго ахоўнікі не прызнавалі сябе вінаватымі. Мэр называў заказчыкам крымінальнай справы супраць яго свайго даўняга апанэнта, кіраўніка Міністэрства ўнутраных спраў Украіны Арсэна Авакава.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG