Лінкі ўнівэрсальнага доступу

«Дырэктар пакрыўдзіўся»: Лідзкая абутковая фабрыка спыніла працу з LSTR пасьля допісу ў Instagram


Лідзкая абутковая фабрыка 1 жніўня адмовілася пастаўляць кеды для менскага брэнду LSTR Adzieńnie, сказаў Свабодзе дырэктар кампаніі Ільля Аксёнаў.

«Мне патэлефанаваў дырэктар Лідзкай фабрыкі і сказаў, што яны спыняюць з намі супрацу», — сказаў Аксёнаў.

Спойлер: ад 6 жніўня дырэктар Лідзкай абутковай фабрыкі Ўладзімер Чыжык будзе ў адпачынку. Кіраўнік LSTR Adzieńnie будзе спрабаваць дамовіцца пра выраб і пастаўку кедаў з намесьнікам дырэктара фабрыкі.

Што адбылося?

Сёлета ў траўні LSTR Adzieńnie сумесна зь Лідзкай абутковай фабрыкай выпусьцілі кеды з выявай герба Калюмны. Клясычную мадэль кедаў ЛМ-17 выпускаюць на фабрыцы больш за 30 гадоў. 40 параў абутку ў краме LSTR прадалі за дзень, і брэнд зрабіў буйнейшую замову.

Пазыцыя LSTR. Паводле Аксёнава, замову з 600 параў кедаў падзялілі на дзьве партыі. Першую лідзкая фабрыка мусіла паставіць праз 3 тыдні пасьля замовы, а паставіла ў канцы ліпеня. У гэты час прадстаўнікі фабрыкі не адказвалі на званкі. Ня выканала фабрыка і наклад першай пастаўкі — замест 300 параў адгрузілі толькі 160. Аплата адбывалася па факце пастаўкі.

Пазыцыя фабрыкі. Апэратыўна зьвязацца з прадстаўнікамі фабрыкі не атрымалася. У інтэрвію «Эўрарадыё» Чырык сказаў, што LSTR замаўляе дробныя партыі, ня хоча браць «вялікі аб’ём» і патрабуе «свайго тэрміну».

«Ніхто нам пра памеры партыяў не казаў. Калі б ён сказаў, што яго не задавальняе, сказаў бы 2 тысячы. Сказалі, ну ок», — камэнтуе словы Чырыка Аксёнаў.

Продажы былі, дык чаму спынілі супрацу?

Атрымаўшы зьменшаную партыю, брэнд ня змог задаволіць попыт на лідзкія кеды, ня ўсе кліенты змаглі забраць 31 ліпеня сваю перадзамову.

На наступны дзень, 1 жніўня, LSTR паабяцаў пакупнікам, якія не змаглі набыць кеды, зьніжку 25% на наступнае наведваньне крамы і распавёў пра невыкананьне фабрыкай папярэдніх дамоўленасьцяў.

«На лідзкую фабрыку сталі тэлефанаваць, журналісты сталі раскручваць, у выніку дырэктар пакрыўдзіўся і сказаў, што так справы ня робяцца», — кажа Аксёнаў.

Кіраўнік LSTR Adzieńnie кажа, што будзе спрабаваць дамовіцца пра выраб і пастаўку абутку з намесьнікам дырэктара лідзкай фабрыкі пасьля 6 жніўня, калі дырэктар пойдзе ў адпачынак.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG