Ад 1 жніўня ў Беларусі павысяцца мінімальныя спажывецкія бюджэты (PDF) і бюджэты пражытковага мінімуму (PDF). Рост большасьці паказьнікаў складзе 2-3%.
Так, да 1 жніўня для працаздольнага насельніцтва сярэднедушавы мінімальны спажывецкі бюджэт складаў 437 рублёў 85 капеек, а стане роўным 445 рублёў 83 капейкі (+1,82%); бюджэт пражытковага мінімуму быў роўны 229,78 рубля, стане роўным 236,98 рубля.
Найменшае падвышэньне з усіх паказьнікаў — у мінімальнага спажывецкага бюджэту для дзяцей да 3 гадоў, на 0,66% да 279,56 рубля. Найбольшае — у бюджэту пражытковага мінімуму ў студэнтаў, на 3,57% да 206,89 рубля.
Вырастуць, адпаведна, і выплаты сем’ям зь дзецьмі, прывязаныя да БПМ. Таксама нязначна вырастуць выплаты пры нараджэньні дзяцей: з 2065,8 да 2136,7 рубля за першае дзіця, з 2892,12 да 2991,38 рубля за другое і наступных. На пачатку году пэнсіі падалі.
Ад 1 жніўня вырастуць і працоўныя пэнсіі. Мінпрацы сьцьвярджае, што сярэдні памер пэнсіі вырасьце адразу на 10%: сярэдняя пэнсія складзе 364,2 рубля, мінімальная па ўзросьце — 207,43 рубля.
У студзені міністарка працы Беларусі Ірына Касьцевіч заявіла, што да 1 студзеня 2019 году будзе перагледжаная структура фармаваньня заробкаў бюджэтнікаў. Прынцыповым момантам рэформы стане «адыход ад тарыфнай стаўкі першага разраду да базавай стаўкі, якую прыраўнуюць да бюджэту пражытковага мінімуму».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў