Ізраіль і групоўка Хамас, якая кантралюе сэктар Газа, дамовіліся аб перамір’і — пасьля таго, як у пятніцу ў адказ на забойства ізраільскага вайсковага ВПС Ізраіля нанесьлі дзясяткі ўдараў па цэлях у Газе.
Ізраільскі ваенны загінуў пасьля абстрэлу з палестынскай тэрыторыі. Гэта першы выпадак гібелі вайскоўца на мяжы з Газай з 2014 года.
У выніку авіяўдараў Ізраіля загінулі чацьвёра палестынцаў. Хамас заявіў, што трое зь іх былі байцамі гэтай узброенай групоўкі. Агонь па цэлях Хамас у Газе адкрывалі таксама ізраільскія танкі.
У ноч на суботу пры пасярэдніцтве Эгіпта бакі дасягнулі пагадненьня аб спыненьні агню.