Лінкі ўнівэрсальнага доступу

ДТЗ ва Ўкраіне: стан траіх беларусаў — «стабільна цяжкі», лекары пакуль ня раяць іх перавозіць у Беларусь


Ілюстрацыйнае фота

Улады Мікалаеўскай вобласьці ва Ўкраіне накіравалі ў Крываазёрскую раённую бальніцу дадатковых хірургаў і траўматалёгаў, каб аказаць дапамогу 12 беларусам, якія пацярпелі ў выніку аварыі сёньня раніцай на адэскай трасе. Падчас аварыі загінулі 5 чалавек — кіроўца і 4 пасажыры.

«Трое пацярпелых па-ранейшаму знаходзяцца ў рэанімацыі, іх стан стабільна цяжкі. Нэгатыўнай дынамікі няма, але і аб пазытыўнай гаварыць рана. Прагнозаў мэдыкі пакуль не даюць ніякіх, але іх стан стабільны», — паведаміў Свабодзе прэсавы сакратар упраўленьня аховы здароўя Мікалаеўскай абласной дзяржаўнай адміністрацыі Юры Багранцаў.

Паводле яго, пакуль яшчэ рана гаварыць аб перавозцы пацярпелых у Беларусь.

«Мэдыкі маюць пераканацца, што іх стан ня будзе пагаршацца, і толькі пасьля гэтага можна будзе абмяркоўваць магчымасьць і неабходнасьць іх транспартаваньня ў Беларусь. Пакуль гэтае пытаньне не стаіць — іх стан не дазваляе гэтага зрабіць, і ня трэба рызыкаваць, бо невядома, як гэта адаб’ецца на іх стане», — патлумачыў ён.

Юры Багранцаў падкрэсьліў, што ўзровень кваліфікацыі дактароў і мэдычнага абсталяваньня ў гэтай лякарні дастатковыя, каб аказаць неабходную дапамогу.

У паліцыі Мікалаеўскай вобласьці Свабодзе паведамілі, што кіроўца грузавіка, зь якім сутыкнуўся беларускі мікрааўтобус, затрыманы і дае сьледчым тлумачэньні, чаму ён прыпыніўся на праезнай частцы і не прыняў ўсіх неабходных мер бясьпекі падчас аварыйнага прыпынку.

Як раней паведаміла прэс-служба Галоўнага ўпраўленьня Нацыянальнай паліцыі ў Мікалаеўскай вобласьці, сьледчыя ўстанавілі асобы грамадзян, якія загінулі і атрымалі траўмы падчас ДТЗ. «Усе яны зьяўляюцца грамадзянамі Рэспублікі Беларусь», — гаворыцца ў паведамленьні.

Сваякі могуць патэлефанаваць і праверыць, ці ёсьць іхныя блізкія ў сьпісе пацярпелых, па нумары +38 (0512) 53-11-13.

Міністэрства ўнутраных спраў Украіны заявіла аб узмацненьні захадаў бясьпекі на дарогах, асабліва пры пасажырскіх перавозках: сёньня празь некалькі гадзін пасьля аварыі зь беларусамі на Мікалаеўшчыне, на трасе Кіеў-Чоп у Жытомірскай вобласьці маршрутка з пасажырамі сутыкнулася з грузавіком — у выніку 10 чалавек загінулі і 10 атрымалі траўмы рознай ступені цяжкасьці.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG