Лінкі ўнівэрсальнага доступу

Анісім прапанавала міністру культуры круглы стол аб мэмарыялізацыі Курапатаў


Мітынг «Дзень памяці пра генацыд» у Курапатах 3 чэрвеня 2018

19 ліпеня дэпутатка Палаты прадстаўнікоў, старшыня Таварыства беларускай мовы імя Францішка Скарыны Алена Анісім накіравала ліст міністру культуры Юрыю Бондару з прапановай правесьці круглы стол па мэмарыялізацыі Курапатаў.

«Курапаты маглі б стаць месцам нацыянальнага прымірэньня. І гэта быў бы моцны штуршок для разьвіцьця ўзаемаадносін паміж дзяржаўнымі органамі і грамадзянскай супольнасьцю. Гэты крок сьведчыў бы пра тое, што мы, жыхары Беларусі, здольныя весьці дыялёг па розных пытаньнях. У тым ліку і па пытаньнях нашай вельмі балючай і няпростай гісторыі», — патлумачыла Свабодзе сваю ініцыятыву Алена Анісім.

Дэпутатка кажа, што яна бачыць за адным сталом дзяржаўных чыноўнікаў, дэпутатаў Палаты прадстаўнікоў, грамадзянскую супольнасьць, найперш з грамадзянскай ініцыятывы «Экспэрты — у абарону Курапат», якія «маюць канцэптуальнае бачаньне таго, што і як мае быць»,

«Такую важную справу трэба рабіць разам. З ужываньнем бюджэтных сродкаў. Нельга, каб яны пайшлі на невядома што» — лічыць Алена Анісім.

Паводле дзейнага заканадаўства адказ дэпутату дзяржаўныя органы мусяць даць цягам двух тыдняў.

11 чэрвеня падчас паседжаньня групы ў справе стварэньня памятнага знаку «прымірэньня і смутку» ў Курапатах улады прадставілі абмежаванаму колу дзяржаўных мэдыя тры «найбольш удалыя эскізы», адабраныя па выніках конкурсу Міністэрства культуры. Экспэрты паставіліся да іх скептычна.

Адзін з эскізаў помніка
Адзін з эскізаў помніка

Генэральная пракуратура не адказвае месяц

Сёньня Свабода пацікавілася яшчэ ў адной дэпутаткі Палаты прадстаўнікоў, Ганны Канапацкай, ці атрымала яна адказ з Генэральнай пракуратуры, куды зьвярталася з дэпутацкім запытам.

«Не, адказу дагэтуль няма, хоць прайшоў ужо месяц. Магчыма, што пракуратура вядзе нейкія праверкі. Бо калі вядуцца праверкі, тады дакладны тэрмін адказу не вызначаецца», — сказала Канапацкая.

Што важна ведаць аб пратэстах супраць новай рэстарацыі ў Курапатах

  • Рэстаран стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
  • 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
  • Грамадзкія актывісты штодня ад 31 траўня пікетуюць забаўляльны комплекс, патрабуючы яго закрыцьця.
  • 1 чэрвеня рэстаран «Поедем поедим» пачаў рэклямавацца ў інтэрнэце.
  • Рэстаран «Поедем поедим» у Курапатах меркавана запрацаваў увечары 5 чэрвеня.
  • 27 чэрвеня наведніцы рэстарацыі на аўтамабілі зьбілі актывіста Леаніда Кулакова, у яго пералом рукі.
  • Старшыня Партыі БНФ Рыгор Кастусёў 13 ліпеня паведаміў пра нейкія дамоўленасьці з уладальнікам рэстарацыі, але якія гэта дамоўленасьці — пакуль не сказаў.
  • Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі.
  • Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.

​Сталінскія рэпрэсіі і Курапаты

У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.

7 адказаў на наіўныя пытаньні пра рэстаран ля Курапатаў і пратэсты супраць яго

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG