У ноч на 15 ліпеня ў Гомельскае ўпраўленьне Міністэрства па надзвычайных сытуацыях паступіла паведамленьне, што каля вёскі Аляшкоўка Лоеўскага раёну ў лясным масіве згубіліся дзеці.
Падчас ратавальнай апэрацыі высьветлілася, што напярэдадні ўвечары жыхар расейскага гораду Беламорск прыехаў на аўтамабілі УАЗ «Патрыёт» на адпачынак у лес блізу Аляшкоўкі. У салёне было трое дзяцей узростам 4, 6 і 8 гадоў.
Для пошуку лепшага месца для кэмпінгу мужчына сеў на ровар, які быў у яго з сабой, пакінуўшы дзяцей у машыне. Аднак неўзабаве заблукаў. Выехаўшы зь лесу каля вёскі Дымамеркі, ён паведаміў пра здарэньне ў міліцыю.
На пошукі адправіліся супрацоўнікі раённых аддзелаў па надзвычайных сытуацыях і ўнутраных спраў. Прыблізна а паловай пятай раніцы 15 ліпеня ў 3 кілямэтрах ад Аляшкоўкі работнік МНС знайшоў аўтамабіль і ўсіх дзяцей.
Мэдычная дапамога нікому не запатрабавалася.
