Старшыня Партыі БНФ Рыгор Кастусёў пагутарыў праз тэлефон з саўладальнікам рэстарацыі «Поедем поедим» Леанідам Зайдэсам і сустрэўся з дырэктаркай рэстарану Сьвятланай Дубковай.
Паводле Рыгора Кастусёва, размова зь Леанідам Зайдэсам адбылася 13 ліпеня, а сустрэча са Сьвятланай Дубковай — днём раней.
«Ёсьць пэўныя рэчы, якія мы дамовіліся не даваць пакуль у СМІ. Калі ўсё рэалізуецца, мы загадзя паведамім пра тую падзею, якая адбудзецца», — сказаў Кастусёў.
Абаронцы Курапатаў: Дыялёг з уласьнікам «Поедем поедим» і чыноўнікамі — толькі пасьля спыненьня працы рэстарацыі
Паводле Кастусёва, Зайдэс сам хоча сустрэцца і «праяўляе ініцыятыву, каб мы сустрэліся, пагутарылі».
«Ён сам зацікаўлены, каб разьвязаць гэты вузел, які ўтварыўся. Але дэталяў мы пакуль не выдаем», — дадаў ён.
Паводле Кастусёва, размова з дырэктаркай таксама была добрай.
Севярынец і Кастусёў аднавілі падрыхтоўку да перамоваў з уладальнікамі рэстарацыі ля Курапатаў
Што важна ведаць аб пратэстах супраць новай рэстарацыі ў Курапатах
- Рэстаран стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут ад 30 тысяч да 250 тысяч чалавек.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Грамадзкія актывісты штодня ад 31 траўня пікетуюць забаўляльны комплекс, патрабуючы яго закрыцьця.
- 1 чэрвеня рэстаран «Поедем поедим» пачаў рэклямавацца ў інтэрнэце.
- Рэстаран «Поедем поедим» у Курапатах меркавана запрацаваў увечары 5 чэрвеня.
- 27 чэрвеня наведніцы рэстарацыі на аўтамабілі зьбілі актывіста Леаніда Кулакова, у яго пералом рукі.
- Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
