Прэзыдэнт Польшчы Анджэй Дуда, які прыбыў у Луцк для ўдзелу ў днях памінаньня ахвяр Валынскай разьні, назваў «этнічнай чысткай» тое, што адбылося 75 гадоў таму. Паводле словаў Дуды, гэта «гадавіна генацыду, што адбыўся на Валыні».
Паводле слоў Дуды, «гэта сумная дата для многіх польскіх сем’яў, якія ў 1942, 1943, 1944 гадах страцілі на Валыні сваіх блізкіх».
«Лічыцца, што тут былі забітыя каля 100 тысяч палякаў — не салдат, а простых людзей, сялян, якія працавалі на зямлі, цэлых сем’яў, жанчын, дзяцей, старых», — адзначыў Анджэй Дуда падчас наведваньня могілак, дзе пахаваныя ахвяры тых падзей.
Прэзыдэнт Польшчы сказаў, што паміж Польшчай і Ўкраінай не было вайны. Паводле яго ацэнкі, «гэта была звычайная этнічная чыстка».
«Гаворка ішла пра тое, каб прыбраць палякаў з тых тэрыторый», — нагадаў ён. «Такія рашэньні тады былі прынятыя на палітычным узроўні ўкраінскай арганізацыяй АУН (Арганізацыя ўкраінскіх нацыяналістаў), а выкананьне было даручана УПА (Украінскай паўстанцкай арміі), якая, на жаль, выканала сваю задачу», — цытуе Дуду польскае агенцтва PAP.
У Польшчы 11 ліпеня адзначаецца як Дзень памяці ахвяраў генацыду, зьдзейсьненага украінскімі нацыяналістамі супраць палякаў.
Прэзыдэнт Украіны Пётар Парашэнка ў нядзелю наведаў Польшчу — сяло Сагрынь Грубэшаўскага павета Люблінскага ваяводзтва і адкрыў мэмарыял у памяць украінцаў, якія загінулі падчас Другой сусьветнай вайны. Парашэнка заклікаў украінцаў і палякаў да ўзаемнага дараваньня.
У рамках свайго візыту ва Ўкраіну прэзыдэнт Польшчы наведае вёску Оліка, дзе знаходзіцца замак сям’і Радзівілаў. Цяпер там знаходзіцца абласная псыхіятрычная бальніца. Таксама Дуда наведае старыя каталіцкія могілкі.
Паводле словаў віцэ-консула Генэральнага консульства Польшчы ў Луцку Марэка Запуры, візыт прэзыдэнта Дуды ў Луцк носіць прыватны характар.
У лютым 1943 года ўкраінскія нацыяналісты пачалі акцыю па зьнішчэнні польскага насельніцтва Валыні. Асаблівай жорсткасьці гэтыя падзеі дасягнулі ў ліпені 1943 году, калі адбыліся напады на польскія вёскі, у выніку чаго загінулі каля 100 тысяч чалавек. У Польшчы трагедыю на Валыні лічаць разьнёй і генацыдам.
