Лінкі ўнівэрсальнага доступу

Канапацкая адмовілася балятавацца на пасаду старшыні АГП


Ганна Канапацкая

Дэпутат Палаты прадстаўнікоў Ганна Канапацкая заявіла аб зьняцьці сваёй кандыдатуры на выбарах старшыні Аб’яднанай грамадзянскай партыі, якія адбудуцца на зьездзе 8 ліпеня, паведамляе БелаПАН.

«Больш за паўгода таму я абвясьціла пра сваё рашэньне балятавацца на пасаду старшыні Аб’яднанай грамадзянскай партыі. У мяне былі ідэі і канкрэтныя захады, як дамагчыся магутнага разьвіцьця нашай палітычнай арганізацыі, павялічыць яе вагу ў палітычных працэсах у Беларусі, — піша Канапацкая ў сваёй заяве. — На працягу мінулага пэрыяду часу я правяла больш за сотню сустрэч з аднапартыйцамі. <...> Мая каманда правяла сур’ёзнае дасьледаваньне і аўдыт дзейнасьці АГП за некалькі гадоў. Вынікам гэтай працы стала выніковая справаздача, якаяю выявіла маю недаацэнку сур’ёзных праблем у Аб’яднанай грамадзянскай партыі ».

«На парадку дня нашай партыі павінна стаяць сыстэмная, структурная перазагрузка. Для яе ажыцьцяўленьня патрабуецца штодзённая карпатлівая праца на працягу некалькіх гадоў. Сумяшчэньне дэпутацкай працы ў Палаце прадстаўнікоў з рэалізацыяй маёй абноўленай праграмы рэформаў АГП не ўяўляецца магчымым», — заявіла Канапацкая.

Акрамя таго, яна вырашыла «сканцэнтраваць максымум намаганьняў на падрыхтоўцы да парлямэнцкіх і прэзыдэнцкіх выбараў, якія пройдуць у 2019 і 2020 гадах».

«Гэтыя важныя выбарчыя кампаніі зьяўляюцца чарговым шанцам як для АГП, так і для ўсёй нашай краіны ўстаць на шлях эканамічнага і палітычнага дынамічнага дэмакратычнага разьвіцьця. Наша партыя абавязаная максымальна поўна скарыстацца ўсімі палітычнымі магчымасьцямі будучых парлямэнцкіх і прэзыдэнцкіх выбараў», — лічыць дэпутатка.

Канапацкая заявіла пра гатовасьць падтрымліваць новага старшыню «ў напрамку адраджэньня Аб’яднанай грамадзянскай партыі, вяртаньня ёй аўтарытэту і павагі ў грамадзтве». «Час пакласьці канец бессэнсоўнаму разладу, сваркам і канфліктам. Я разьлічваю на тое, што новае кіраўніцтва АГП адновіць давер унутры арганізацыі, створыць атмасфэру палітычнага драйву і жаданьня кожнага члена партыі працаваць на нашу агульную перамогу», — напісала яна.

З 2000 году АГП узначальвае Анатоль Лябедзька. Яшчэ ў красавіку ён заяўляў, што на «99,9%» ня будзе прэтэндаваць на пасаду старшыні партыі, аднак нядаўна зьмяніў рашэньне. На выбарах балятуюцца таксама яго намесьнікі Мікалай Казлоў і Васіль Палякоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG