Камітэт выведкі Сэнату Кангрэсу ЗША падтрымаў у аўторак заключэньне выведніцкай супольнасьці пра тое, што Расея ўмешвалася ў прэзыдэнцкія выбары 2016 году з мэтай спрыяньня кампаніі Дональда Трампа.
«Камітэт амаль паўтара года вывучаў аналітычную працу, праведзеную выведніцкай супольнасьцю, і крыніцы, на якіх яна грунтавалася, і ня бачыць ніякіх прычын аспрэчваць яе высновы», — гаворыцца ў публічнай заяве, распаўсюджанай старшынём камітэту рэспубліканцам Рычардам Бэрам.
Пазыцыя сэнатараў, аднак, разыходзіцца з ацэнкай іх калег з камітэту выведкі Палаты прадстаўнікоў, якія выпусьцілі ў сакавіку сваю ўласную справаздачу аб умяшаньні Расеі ў амэрыканскія прэзыдэнцкія выбары. У справаздачы камітэту Палаты прадстаўнікоў гаворыцца, што выведка памылілася, заключыўшы, што Расея жадала перамогі Трампа. Аўтары дакумэнту таксама адзначалі адсутнасьць адкрытых зьвестак, якія сьведчаць аб змове людзей з выбарчага штабу Трампа з Крамлём. Меркаваная змова стала прадметам расьсьледаваньня спэцпракурора Робэрта Мюлера.
Амэрыканская прэса піша, што даклад сэнацкага камітэту можа сапсаваць атмасфэру сустрэчы Трампа і Пуціна, якая адбудзецца 16-га ліпеня ў Хэльсынкі. Сэнатары пагадзіліся з выведніцкай супольнасьцю ў тым, што расейскія спэцслужбы ня толькі наўмысна дапамагалі Трампу, але і рабілі гэта на асабістае распараджэньне Ўладзіміра Пуціна.
