Эўрапейская камісія пачала новае расьсьледаваньне адносна польскіх уладаў з прычыны рэформы Вярхоўнага суду. Пра гэта гаворыцца ў паведамленьні, апублікаваным на сайце Эўракамісіі.
Новы закон аб Вярхоўным судзе ў Польшчы уступае ў сілу 3 ліпеня. Ён прадугледжвае датэрміновую адстаўку судзьдзяў па дасягненьні імі ўзросту 65 гадоў.
Як паведамляе Deutsche Welle, гэта можа прывесьці да адстаўкі 40 адсоткаў судзьдзяў. У штаце застануцца толькі тыя, хто прадставіў мэдычныя дакумэнты і атрымаў згоду прэзыдэнта краіны.
Апроч іншага новы закон дае паўнамоцтвы міністру юстыцыі ініцыяваць адстаўку і прызначаць судзьдзяў Вярхоўнага суду.
У ЭЗ лічаць, што новы польскі закон падрывае незалежнасьць судовай сыстэмы. На працягу месяца Брусэль можа зьвярнуцца ў Эўрапейскі суд з патрабаваньнем аштрафаваць Варшаву за прыняцьце закону.
Кіруючая партыя Польшчы «Закон і справядлівасьць» пачала судовую рэформу ў 2015 годзе. Тады ў Варшаве заявілі, што судзьдзі Вярхоўнага суду былі прызначаныя папярэднім урадам.
У сьнежні 2017 году Эўракамісія прыстрашыла Польшчу санкцыямі і запатрабавала ад Варшавы перагляду пазыцыяў па судовай рэформе. Польскія ўлады назвалі рашэньне Эўракамісіі палітычным.