Лінкі ўнівэрсальнага доступу

Футбольны камэнтатар узгадвае менскі стадыён «Дынама»


Главный белорусский стадион открылся после 6 лет реконструкции
пачакайце

No media source currently available

0:00 0:01:55 0:00

У цэнтры Менску пасьля доўгага рамонту адкрылі стадыён «Дынама». Яго рэканструявалі шэсьць гадоў і шэсьць разоў пераносілі запуск. Стадыён пабудавалі яшчэ ў 1934 годзе, апошні раз рамантавалі да Алімпіяды-80. Легендарны беларускі спартовы камэнтатар Леанід Бандаровіч распавёў, якімі былі іх жыцьці — яго і стадыёну.

У Беларусі кожны вопытны заўзятар пазнае голас камэнтатара Леаніда Бандаровіч — менавіта ён ад пачатку 1990-х вёў усе футбольныя матчы на менскім «Дынама».

«Людзі, якія да спорту прывязаныя, якія яго любяць, безумоўна ведаюць, што гэтая кропка на плянэце для нас, беларусаў, мае грандыёзнае значэньне», — кажа ён пра стадыён «Дынама».

Першыя 25 гадоў свайго жыцьця легендарны дыктар правёў у доме праз дарогу ад стадыёну. З акна яго кватэры бачныя галоўная брама, з гарышча — гульнявое поле.

«Ад пад’езда майго дома да аркі, да ўваходу — 45 крокаў. Я палічыў. Магло апынуцца больш, 47, 49, усё роўна, 43... У мяне атрымалася 45. Я спыніўся на гэтай лічбы і знайшоў гэтаму тлумачэньне. 45 крокаў — гэта 45 хвілін аднаго футбольнага тайма. А туды і назад — гэта футбольны матч», — цешыцца такім супадзеньням Бандаровіч.

Стадыён "Дынама". Падрыхтоўка да XXII Алімпійскіх гульняў, 1980 год
Стадыён "Дынама". Падрыхтоўка да XXII Алімпійскіх гульняў, 1980 год

Успамінаючы пра «Дынама» свайго дзяцінства, Леанід Георгіевіч кажа ня толькі пра футбол.

«Узімку тут быў надзвычайны каток. Я, ня пераадзяваючыся, на каньках спускаўся з дому, без чахлоў, па прыступках грукочучы, і ішоў на каток. Перайсьці вуліцу Кірава — і я на катку. Пад музыку, пад гэтыя сьняжынкі, што падалі... — успамінае Бандаровіч. — Ведаеце, стадыён „Дынама“ — гэта было ўсё: і адпачынак, і спорт, і асалода, і заўзеньне».

Моманту, калі ён зможа выйсьці на газон стадыёну пасьля рэканструкцыі, Леанід Бандаровіч чакаў гадамі. 22 лістападу 2012 году ў апошні раз ён адпрацаваў ля стадыённага мікрафону. Вярнуцца сюды зноў для яго вялікая радасьць.

«Я памятаю стадыён, калі таблё тут былі, як у мультфільмах, ведаеце, калі кругі перагортваюцца. Калі тут былі драўляныя лавы, успамінае ён. — Мы кожную вясну набівалі нумары на 40 тысяч месцаў, таму што яны былі драўляныя, а нумары за зіму змываліся».

Праз год пасьля адкрыцьця абноўленай арэны менскага «Дынама» тут пройдзе цырымонія адкрыцьця II Эўрапейскіх гульняў і спаборніцтвы па лёгкай атлетыцы.

Разьвітаньне са стадыёнам «Дынама»

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG