У часе сусьветнай прэм’еры ўкраінскага фільма «Вулькан» на міжнародным кінафэстывалі ў чэскім горадзе Карлавы Вары рэжысэр Раман Бандарчук нагадаў пра зьняволенага ў Расеі ўкраінскага кінарэжысэра Алега Сянцова.
«Я хачу прыцягнуць увагу да Алега, майго калегі, які ўжо 49 дзень галадае ў расейскай турме. Мы павінны памятаць пра яго і яшчэ пра 60 палітвязьняў», — заявіў украінскі рэжысэр са сцэны Муніцыпальнага тэатру, дзе праходзіла прэмʼера фільма.
У зале кінатэатру разьмясьцілі плякат «Free Sentsov», — паведамляе карэспандэнт Радыё Свабода.
Украінскі поўнамэтражны мастацкі фільм «Вулькан» рэжысэра Рамана Бандарчука ўвайшоў сёлета ў конкурсную праграму 53-га міжнароднага кінафэстывалю ў Карлавых Варах. Ён паказваецца ў фэстывальнай сэкцыі «На Ўсход ад Захаду».
У гэтай жа сэкцыі паказалі фільм беларускай рэжысэркі Дар’і Жук «Крышталь». Стала вядома, што гэты фільм Беларусь вылучыла на «Оскара».