Сацыяльная сетка Twitter увядзе абавязковае пацьвярджэньне рэгістрацыі карыстальнікаў праз электронную пошту і тэлефонныя нумары для таго, каб пазбавіцца ад «троляў» і бот-акаўнтаў.
Пра гэта паведамілі ў блогу кампаніі яе кіраўнікі, віцэ-прэзыдэнт Twitter Дэл Гарві і кіраўнік аддзелу кампаніі бясьпекі Іаель Рот.
«Мы ніколі не спынім нашыя намаганьні па выяўленьні і прадухіленьні спробаў маніпуляваньня абмеркаваньнем на нашай плятформе» — заявілі яны.
Прадстаўнікі Twitter адзначылі, што аддаюць перавагу прадухіляць праблему, чым чакаць звароту карыстальнікаў.
Кожны тыдзень траўня 2018 году сыстэмы Twitter выяўлялі каля 10 мільёнаў аўтаматычных уліковых запісаў і спам-акаўнтаў.
Аўтары заявы адзначаюць, што дзякуючы тэхналягічным удасканаленьням на працягу гэтага году кампанія выдаліла ўдвая болей акаўнтаў, чым летась, за парушэньне правілаў у дачыненьні да спаму.
