У Нямеччыне паліцыя затрымала ў мінулую пятніцу былога целаахоўніка Ўсамы бін Ладэна. Пра гэта сёньня паведаміла выданьне Bild.
У публікацыі гаворыцца, што ўлады ФРГ рыхтуюць выправаджэньне 42-гадовага ісламіста, імя якога не называецца, у Туніс, грамадзянiнам якой ён зьяўляецца.
Былы набліжаны «галоўнага тэрарыста», які кіраваў эктрэмісцкай сеткай «Аль-Каіда» і быў забіты ў выніку спэцапэрацыі ЗША 2 траўня 2011 году ў Пакістане, атрымліваў у Нямеччыне штомесячную дапамогу на сябе і сваю сям’ю ў суме каля 1 тысячы 200 эўра, паведамляецца ў публікацыі Bild.
Паліцыя затрымала яго ў горадзе Бохум, на захадзе Нямеччыны, дзе выхадзец з Тунісу жыве са сваёй сямʼёй ужо некалькі гадоў. Затрыманьне адбылося ў момант, калі паднаглядны былы паплечнік бін Ладэна, як звычайна, прыехаў у паліцэйскі ўчастак для штодзённай рэгістрацыі.
Праваахоўныя органы Нямеччыны вырашылі выдварыць яго як чалавека, «які прадстаўляе пагрозу грамадзтву». Тунісец упершыню прыбыў у Нямеччыну ў 1997 годзе. Вайсковую практыку прайшоў у лягерах у Аўганістане. Ад 1999 па 2000 год працаваў целаахоўнікам лідэра «Аль Каіды». Ад 2008 году атрымліваў у Нямеччыне штомесячную дапамогу. Члены яго сямʼi маюць грамадзянства ФРГ.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў