У Турцыі праходзяць датэрміновыя парлямэнцкія і прэзыдэнцкія выбары. Гэта першае галасаваньне пасьля прыняцьця на рэфэрэндуме паправак да канстытуцыі, якія ўзмацнілі ўладу прэзыдэнта. Па ўсёй краіне адкрытыя 180 тысяч выбарчых участкаў.
Фаварытам выбараў, паводле апытаньняў, застаецца дзеючы прэзыдэнт Рэджэп Эрдаган, аднак яго галоўны апанэнт, кандыдат ад апазыцыйнай Народна-рэспубліканскай партыі Мухарам Інджэ, захоўвае шанцы на выхад у другі тур.
Напярэдадні прыхільнікі Інджэ правялі масавы мітынг у Стамбуле. Па словах кандыдата, на яго сабраліся мільёны людзей. Раней масавыя мітынгі з удзелам сотняў тысяч людзей прайшлі ў Анкары і Ізміры.
Інджэ паабяцаў сваім прыхільнікам, што ў выпадку перамогі адменіць рэжым надзвычайнага становішча, які ўведзены ў Турцыі пасьля падаўленьня спробы перавароту, а таксама спыніць палітыка дыскрымінацыі грамадзянаў краіны. За апошнія гады тысячы людзей падвергнуліся перасьледам па палітычных матывах.
Эрдаган знаходзіцца на вяршыні дзяржаўнай улады ўжо больш за 15 гадоў — спачатку на пасадзе прэм’ера, а з 2014 году — на пасадзе прэзыдэнта.
Усяго на пасаду прэзыдэнта прэтэндуюць шэсьць кандыдатаў, у тым ліку лідэр пракурдзкой Партыі дэмакратыі народаў Селахатын Дэмірташ, які знаходзіцца ў зьняволеньні.
На парлямэнцкіх выбарах, якія праходзяць адначасова з прэзыдэнцкімі, па апытаньнях, вядуць рэй прыхільнікі Эрдагана. Аднак яны могуць пазбавіцца большасьці ў парлямэнце, паколькі чатыры вядучыя апазыцыйныя партыі стварылі перадвыбарчы альянс.
