Лінкі ўнівэрсальнага доступу

У праваслаўных прыходах у Беларусі моляцца, каб пайшоў дождж


Ілюстрацыйнае фота
Ілюстрацыйнае фота

У траўні і чэрвені ў Беларусі пераважае засушлівае надвор’е, ападкаў мала. У вясковых праваслаўных прыходах на просьбу вернікаў і з ініцыятывы сьвятароў адпраўляюць малебны ад бездажджоўя.

Пра гэта паведаміў Свабодзе начальнік інфармацыйнага аддзелу Беларускай праваслаўнай царквы протаярэй Сергій Лепін.

Сьвятар патлумачыў, што ёсьць абавязковыя набажэнствы: ранішнія, вячэрнія, усяночныя. А ёсьць набажэнствы адмысловыя, якія служаць тады, як узьнікаюць пэўныя патрэбы.

Сяргей Лепін
Сяргей Лепін

«Таму і называюцца яны „трэбныя“ — ад стараславянскага „трэбы“. Малебен аб дажджы — гэта якраз адно з сытуацыйных набажэнстваў, якое служыцца не паводле раскладу, а менавіта калі ўзьнікае неабходнасьць, паступаюць звароты вернікаў.

Бываюць набажэнствы аб дажджы, альбо наадварот, каб яго не было, малітвы ў час лясных пажараў, у час эпідэмій, пошасьці жывёлаў. Гэта на просьбу прыхаджанаў, з ініцыятывы сьвятароў, ніякіх цыркуляраў і загадаў няма», — сказаў пратаярэй Сергій Лепін.

Афіцыйны прадстаўнік Каталіцкай царквы Юры Санько паведаміў, што гэтымі днямі ў каталіцкіх парафіях таксама моляцца аб дажджы і спрыяньні прыродзе.

Паводле Белгідрамэту, у траўні ў некаторых раёнах Беларусі выпала толькі каля 10-20% ад месячнай нормы ападкаў. У чэрвені пакуль захоўваецца гарачае надвор’е, тэмпэратура на 4-7 градусаў вышэйшая за кліматычную норму. У выніку ў асобных раёнах склалася надзвычайная пажаранебясьпечная сытуацыя ў лясах, узровень вады ў многіх рэках істотна апусьціўся. Але сытуацыя можа зьмяніцца неўзабаве. З 22 чэрвеня ўмовы надворʼя ў Беларусі будзе вызначаць актыўны атмасфэрны фронт, які зьмяшчаецца з Заходняй Эўропы. Сыноптыкі прагназуюць дажджы, навальніцы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG