На захадзе Аўганістанe баявікі руху «Талібан» падчас некалькіх нападаў забілі прынамсі 30 аўганскіх вайскоўцаў.
Паведамленьні аб нападах у правінцыі Багдыс пацьвердзіў яе губэрнатар і самі талібы.
Гэта першы буйны напад пасьля завяршэньня перамірʼя, якое аўганскія ўлады заключылі з талібамі з 12 да 19 чэрвеня ў сувязі са сьвяткаваньнем завяршэньня месяца Рамадан.
Аўганскія ўлады ў аднабаковым парадку працягнулі перамірʼе, аднак талібы адмовіліся яго выконваць.
Прадстаўнік уладаў паведаміў агенцтву France Presse, што «Талібан» выкарыстаў перамірʼе для збору інфармацыі аб месцах дысьлякацыі ўрадавых войскаў.