Лінкі ўнівэрсальнага доступу

Трамп скрытыкаваў міграцыйную палітыку ў Нямеччыне


Ангела Мэркэль і Дональд Трамп на саміце «вялікай сямёркі», 9 чэрвеня 2018

Прэзыдэнт ЗША Дональд Трамп ў панядзелак скрытыкаваў стан міграцыйнага пытаньня ў Эўропе — на фоне спрэчак у Нямеччыне па праблемах іміграцыі.

«Народ у Нямеччыне паварочваецца супраць уласных лідэраў, што наносіць новыя ўдары па і без таго хісткай бэрлінскай кааліцыі. У Нямеччыне расьце злачыннасьць. Зробленая велізарная памылка па ўсёй Эўропе — дазволілі прыехаць мільёнам людзей, якія так груба і моцна зьмянілі мясцовую культуру», — напісаў Трамп у Твітэры.

«Мы не хочам, каб тое, што адбываецца з міграцыяй у Эўропе, здарылася ў нас!» — падкрэсьліў прэзыдэнт ЗША.

У Нямеччыне паўстала пагроза ўрадавага крызісу ў сувязі са спрэчкамі аб міграцыйнай палітыцы паміж канцлерам Ангелай Мэркель і міністрам унутраных справаў, лідэрам адной з партыяў кааліцыі, Хрысьціянска-сацыяльнага саюзу (ХСС), Горстам Зэегофэрам.

Зэегофэр настойвае на ўзмацненьні жорсткасьці міграцыйнай палітыкі, у прыватнасьці, на тым, каб Нямеччына пачала адпраўляць бежанцаў, якія знаходзяцца на яе тэрыторыі, у тыя краіны Эўразьвязу, дзе яны зьвярнуліся па прытулак. У 2015 годзе — у разгар міграцыйнага крызісу — Мэркель адмовілася выконваць гэты прынцып, заявіўшы, што Нямеччына здольная паклапаціцца пра ўцекачоў, якія прыбываюць у Эўразьвяз, незалежна ад таго, дзе яны перасеклі мяжу ЭЗ. Паводле ацэнак, у Нямеччыну за тры гады прыбыла каля паўтара мільёна бежанцаў.

Зэегофэр, нягледзячы на пярэчаньні Мэркель, як чакаецца, абвесьціць аб увядзеньні ў дзеяньне свайго пляну. Канцлер можа заблякаваць яго, што, хутчэй за ўсё, прывядзе да адстаўкі міністра. Гэта, у сваю чаргу, можа прывесьці да выхаду ХСС з кааліцыі з Хрысьціянска-дэмакратычным саюзам Мэркель, што прывядзе да таго, што яе кабінэт страціць большасьць у Бундэстагу.

Мэркель сьцьвярджае, што неабходна ўзгадніць зьмены ў міграцыйнай палітыцы зь іншымі краінамі ЭЗ і просіць Зэегофэра адкласьці ўвядзеньне ў дзеяньне яго пляну да саміту Эўразьвязу, які пройдзе ў канцы чэрвеня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG