Прэс-сакратар прэзыдэнта Расеі Дзьмітрый Пяскоў лічыць, што нядопуск на мінулым тыдні ўкраінскай упаўнаважанай у правах чалавека ў калёнію да Алега Сянцова не азначае зрыву дамоўленасьцяў, дасягнутых паміж Уладзімірам Пуціным і Пятром Парашэнкам.
Адказваючы на пытаньне журналістаў, ці ёсьць прагрэс у пытаньні абмену ўкраінскіх зьняволеных у Расеі і расейскіх ва Ўкраіне, Пяскоў сказаў, што «праца ў выкананьні дасягнутых дамоўленасьцяў вядзецца».
Раней расейскі і ўкраінскі прэзыдэнты дамовіліся па тэлефоне, што амбудсмэны дзьвюх краін наведаюць зьняволеных на тэрыторыі РФ і Украіны. Упаўнаважаная па правах чалавека Вярхоўнай Рады Ўкраіны Людміла Дзянісава адправілася ў Расею, а расейскі амбудсмэн Тацьцяна Маскалькова, як чакаецца, наведае Ўкраіну на гэтым тыдні.
Дзянісава прыбыла 15 чэрвеня ў Лабытнангі, дзе ў калёніі «Белы мядзьведзь» знаходзіцца ўкраінскі рэжысёр Алег Сянцоў. Аднак кіраўніцтва калёніі не дазволіла Дзянісавай убачыць зьняволенага.
Сёньня Дзянісава павінна сустрэцца з Тацьцянай Маскальковай і паспрабаваць дамовіцца аб наведваньні Сянцова.
Алег Сянцоў ужо 35-ы дзень трымае галадоўку, патрабуючы вызваленьня ўкраінскіх палітвязьняў у Расеі.
