Лінкі ўнівэрсальнага доступу

Віцэ-прэм’ер Мацюшэўскі: У Беларусі хутка зьнікнуць прафэсіі прадаўца і кіроўцы


Васіль Мацюшэўскі

Першы намесьнік кіраўніка беларускага ўраду Васіль Мацюшэўскі распавёў сёньня ў Палаце прадстаўнікоў дэпутатам, як рэалізуецца прэзыдэнцкі дэкрэт № 8 «Аб разьвіцьці лічбавай эканомікі».

Першы намесьнік старшыні Савету Міністраў сказаў, што «ў бліжэйшыя гадоў дзесяць мы ўсе пабачым, як зьнікнуць прафэсіі прадаўца і кіроўцы. Тысячы банкаўскіх служачых пазбавяцца сваёй працы ў банку. Гадоў праз 10–15 у людзей ня будзе неабходнасьці мець уласную машыну — яны ў любы час могуць узяць у арэнду тую машыну, якая ім патрэбная ў гэты момант».

Усё гэта Мацюшэўскі зьвязаў з разьвіцьцём лічбавага бізнэсу і разьвіцьцём у галіне інтэлектуальнай працы.

Ён сказаў, што Парк высокіх тэхналёгій у Беларусі, які з прыходам новага дырэктара Ўсевалада Янчэўскага пачаў працаваць па-новаму, значна набірае абароты.

«Толькі за пяць месяцаў сёлета прыйшло 100 новых кампаній. Гэта абсалютны рэкорд за ўсе гады. Калі тэмпы захаваюцца, то можа атрымацца так, што ў 2018 годзе ў Парк прыйдзе больш кампаній, чым за ўсе папярэднія гады».

Разам з тым першы віцэ-прэм’ер зьвярнуў увагу на тое, што ў Беларусі ўзрост выкладчыкаў тэхнічных ВНУ набліжаецца да 60 гадоў.

«Калі не рабіць тэрміновых захадаў, то хутка ня будзе каму рыхтаваць айцішнікаў», — сказаў ён.

Ня ўсе дэпутаты прынялі гэтую карціну будучыні на веру. Так, Мікалай Улаховіч запытаў: ці ня стане гэты праект надзіманым шарыкам, які хутка лопне? А дэпутатка Вольга Палітыка папрасіла віцэ-прэм’ера падмацаваць свае словы эканамічнымі разьлікамі.

Пасьля дакладу 99 дэпутатаў са 100 прагаласавалі за тое, каб яго «прыняць да ведама». Супраць галасавала Ганна Канапацкая.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG