Новым мэрам Кішынэва стаў лідэр правай праэўрапейскай апазыцыйнай партыі «Плятформа DA» Андрэй Нэстасе, які атрымаў перамогу ў другім туры выбараў кіраўніка сталіцы Малдовы.
Ён набраў 52,57 адсоткаў галасоў выбарцаў, у той час як яго галоўны канкурэнт — прадстаўнік прапрэзыдэнцкай Партыі сацыялістаў Іван Чэбан — атрымаў 47,43 адсоткаў.
Выступаючы перад выбарцамі пасьля абвяшчэньня вынікаў выбараў, Нэстасе абвясьціў пра намер перамагчы і на выбарах у парлямэнт Малдовы, паабяцаўшы «скінуць цяперашні рэжым у Малдове» і «вызваліць ад Плахатнюк-Дадона захопленую краіну», прыводзіць яго словы Deutsche Welle (маюцца на ўвазе алігарх Улад Плахатнюк і прэзыдэнт Малдовы Ігар Дадон).
Са сьнежня 2016 гады пасаду прэзыдэнта Рэспублікі Малдова займае прадстаўнік сацыялістаў, які спачувае Маскве Ігар Дадон. Ён пасьлядоўна супраціўляецца інтэграцыі краіны ў эўрапейскія палітычныя і абаронныя структуры, у тым ліку NATO.