Рыхтуецца праект указу кіраўніка краіны аб стварэньні зараднай інфраструктуры для электратранспарту. Пра гэта ў інтэрвію праграме «Контуры» тэлеканала АНТ паведаміў віцэ-прэм’ер Беларусі Ўладзімер Сямашка.
Паводле яго, ідзецца перадусім аб стварэньні сеткі заправачных станцыяў з інтэрвалам ня больш за 100 км.
Праект указу праходзіць апошнія ўзгадненьні і на наступным тыдні будзе ўнесены ў адміністрацыю прэзыдэнта, сказаў намесьнік прэм’ера.
Паводле Сямашкі, у Менску ўжо працуюць 20 электробусаў, а «Белкамунмаш» мае заказы «на тысячы» электробусаў.
Сямашка таксама сказаў, што ў плянах беларускага вытворцы легкавога аўтатранспарту вырабіць і прадаць 70 тысяч электрамабіляў.
