Адміністрацыя прэзыдэнта ЗША Трампа рыхтуецца да ўвядзеньня санкцыў у дачыненьні да энэргакампаній Нямеччыны і шэрагу іншых эўрапейскіх краін, якія ўдзельнічаюць у будаўніцтве трубаправода «Паўночны паток −2».
Як паведамляе са спасылкай на дасьведчаныя крыніцы выданьне Foreign Policy, Белы дом разглядае і іншыя шляхі блякаваньня праекту «Паўночны паток», але большасьць ключавых фігур у адміністрацыі схіляюцца да санкцыйнага сцэнару. Аналягічныя настроі пераважаюць і ў Кангрэсе ЗША.
Вашынгтон і многія ўсходнеэўрапейскія сталіцы асьцерагаюцца, што «Паўночны паток-2», які павінен удвая павялічыць прамыя пастаўкі газу з Расеі ў Нямеччыну, яшчэ больш узмоцніць залежнасьць Заходняй Эўропы ад расейскіх энэргарэсурсаў.
Трубаправод павінен быць пракладзены па дне Балтыкі і прапампоўваць прыродны газ з Расеі ў Заходнюю Эўропу ў абыход Украіны і Польшчы.
