Юрыст Джузэпэ Контэ ўзначаліў урад Італіі. Сёньня ён прыняў прысягу. Раней Контэ прадставіў прэзыдэнту склад будучага італьянскага ўраду. На наступным тыдні новы кабінэт міністраў павінен будзе атрымаць вотум даверу ў абедзьвюх палатах нацыянальнага парлямэнту.
На пасаду прэм’ер-міністра Контэ вылучылі дзьве папулісцкія партыі — «Рух пяці зорак» і «Ліга».
Агенцтва Reuters удакладняе, што новы кіраўнік ураду Італіі паабяцаў займацца скарачэньнем падаткаў, павялічыць выдаткі на сацыяльнае забесьпячэньне, а таксама настойваць на пераглядзе правілаў Эўразьвязу ў дачыненьні да мігрантаў.
Урад Італіі не маглі сфармаваць больш за два месяцы. Парламенцкія выбары, якія прайшлі 4 сакавіка, ня выявілі яўнага пераможцы. Зь невялікай перавагай перамагла правацэнтрысцкая кааліцыя Сільвіё Бэрлюсконі. У яе ўваходзіць праварадыкальная «Ліга», якая прапаноўвала скасаваць санкцыі супраць Расеі. Партыя эўраскептыкаў «Рух пяці зорак» заручылася падтрымкай амаль траціны выбаршчыкаў.
Джузэпэ Контэ нарадзіўся ў Італіі ў 1964 годзе. На выдатна скончыў юрыдычны факультэт Рымскага ўнівэрсытэту. Стажыраваўся ў Ельскім унівэрсытэце, у Нью-Ёрскім унівэрсытэце, у Сарбоне, у Гіртанском каледжы ў Кэмбрыджы. Выкладаў прыватнае і камэрцыйнае права ва ўнівэрсытэтах ў Рыме. Ад 2013 па 2018 год уваходзіў у Раду па прававых пытаньнях пры прэзыдэнце Італіі. Член Рымскай асацыяцыі адвакатаў.