У Паўночную Карэю ў нядзелю прыбыла група амэрыканскіх афіцыйных асоб для перамоў аб падрыхтоўцы сустрэчы прэзыдэнта ЗША Дональда Трампа зь лідэрам КНДР Кім Чэн Ынам — паведамляе газэта The Washington Post. Дэлегацыю, як сьцьвярджаецца, узначальвае былы амбасадар ЗША ў Паўднёвай Карэі Сунг Кім.
Раней паведамлялася аб тым, што каля 30 супрацоўнікаў Белага дому і Дзярждэпартамэнту адправіліся ў Сынгапур для падрыхтоўкі саміту, які быў намечаны на 12 чэрвеня.
Некалькі дзён таму Трамп заявіў аб адмене сустрэчы з Кім Чэн Ынам, абвінаваціўшы КНДР у недружалюбнай рыторыцы. Аднак затым і Трамп, і дзяржсакратар ЗША Майк Пампэо далі зразумець, што саміт 12 чэрвеня ў Сынгапуры па-ранейшаму магчымы.
У суботу на мяжы Паўночнай і Паўднёвай Карэі прайшла сустрэча Кім Чэн Ына з прэзыдэнтам Паўднёвай Карэі Мун Чжэ Інам. Як заявіў у нядзелю паўднёвакарэйскі прэзыдэнт, Кім Чэн Ын на сустрэчы пацьвердзіў сваю прыхільнасьць дэнуклеарызацыі Карэйскай паўвыспы і выказаў надзею, што сустрэча 12 чэрвеня адбудзецца і будзе пасьпяховай.
