Прынамсі 12 чалавек загінулі ў выніку авіяўдару па падразьдзяленьнях урадавай арміі Сірыі ў правінцыі Дэйр-эз-Зор на ўсходзе краіны.
Пра гэта паведамляе агенцтва France Press са спасылкай на Сірыйскі цэнтар маніторынгу правоў чалавека. Паводле зьвестак праваабаронцаў, ні адзін з загінулых ня быў грамадзянінам Сірыі. Больш падрабязнай інфармацыі арганізацыя не дала.
Раней дзяржаўныя сірыйскія СМІ паведамілі, што самалёты міжнароднай кааліцыі атакавалі пазыцыі арміі Сірыі. Агенцтва Reuters удакладняе, што авіяўдары былі нанесеныя побач зь мяжой зь Іракам.
Міністэрства абароны ЗША заявіла, што не валодае інфармацыяй пра магчымыя авіяўдары. У Мінабароны Расеі сказалі, што паведамленьні пра атаку кааліцыі не адпавядаюць рэчаіснасьці.