Асабісты юрыст прэзыдэнта ЗША Дональда Трампа Майкл Коэн атрымліваў грошы ад прадстаўнікоў украінскага лідэра Пятра Парашэнкі, каб арганізаваць леташнюю сустрэчу паміж Парашэнкам і Трампам ў Белым доме. Пра гэта паведамляе «Бі-бі-сі» са спасылкай на ўласныя крыніцы.
Паводле дадзеных брытанскай мэдыякарпарацыі, Коэн праз ланцужок пасрэднікаў атрымаў ад прадстаўнікоў ўкраінскага прэзыдэнта каля 400 тысяч долараў. Неўзабаве пасьля гэтага адбылася сустрэча Трампа і Парашэнкі ў Белым доме. А празь некаторы час пасьля яе стала вядома, што Нацыянальнае антыкарупцыйнае бюро Ўкраіны спыніла расьсьледаваньне па справе былога кіраўніка штабу Трампа — Пола Манафорта.
У «Бі-бі-сі» няма інфармацыі аб тым, што самому Дональду Трампу было вядома аб атрыманьні ягоным юрыстам буйной сумы грошай. У Адміністрацыі прэзыдэнта Ўкраіны паведамленьне «Бі-бі-сі» не камэнтуюць.
