Тэрарыстычная групоўка «Ісламская дзяржава» ўзяла на сябе адказнасьць за напад на праваслаўны храм Архангела Міхаіла ў Грозным. Пра гэта ў нядзелю, 20 траўня, паведаміла незалежная маніторынгавая група SITE Intelligence Group.
Пры нападзе загінулі двое паліцыянтаў і адзін парафіянін. Нападнікаў застрэлілі супрацоўнікі паліцыі.
Афіцыйна пра матывы тых, хто нападаў на праваслаўны храм у Грозным, нічога не вядома. Сьледчы камітэт Расеі распачаў крымінальную справу аб замаху на жыцьцё супрацоўніка праваахоўнага органа.
Кіраўнік Чачэнскай рэспублікі Рамзан Кадыраў паведаміў, што вядома на цяперашні час пра нападнікаў:
«Двое зь іх — жыхары вёскі Гелдаган, адзін — з пасёлка Аргунскі, разьмешчанага непадалёк ад Грознага. Паводле дадзеных МУС Чачні, верхавод групы быў ураджэнцам і жыхаром аднаго з суседніх рэгіёнаў», — напісаў Кадыраў у сваім канале ў мэсэнджары Telegram.
Усе чацьвёра спрабавалі захапіць закладнікаў у праваслаўным храме Архангела Міхаіла ў суботу, 19 траўня.
